Дагъустан Республикадин Кьил Сергей Меликова 31-июлдиз важиблу месэлайрай совещание кьиле тухвана. Мярекатда региондин ведомствойрин руководителри ва муниципалитетрин кьилери иштиракна. Совещанидал мектебар капремонт авун тешкилунин, РФ-дин «Национальная система пространственных данных» госпрограмма кьилиз акъудунин ва ЖКХ-дин хилез талукь месэлаяр веревирдна.
Асул месэлайрив эгечIдалди вилик Сергей Меликова махсус серенжемда иштиракзавай хва уставдихъ галаз кьан тийизвай гьерекатрик кутуникай адандидеди авур арзадиз баянар гана. Идалай вилик информациядин са бязи такьатриз акъатай малуматрай, аскердин дидеди Москвада авай РД-дин векилханадин руководителдин тIварцIихъ арза кхьенвай. Адан хци алатай йисан сентябрдилай военный махсус серенжемда иштиракзава. Дишегьлидин гафаралди, адаз талукь къурулушрин патай куьмек гун лазим я, амма аквадай хьтин серенжемар кьабулзавач.
Республикадин Кьили хабар гайивал, месэладай гьахълу къарар кьабулун патал РД-дин векилханади талукь документар военный прокуратурадиз рекье тунва. Арадал атанвай гьал Сергей Меликова вичин хсуси гуьзчивилик кутунва. Герек хьайитIа, алава серенжемарни кьабулда.
«СВО-дин иштиракчийриз ва абурун хизанриз талукь са месэлани фикир тагана амукьдач!» — къейдна ада.
Субъектдин регьберди рикIел хкайвал, республикадин Кьилин администрациядин къуллугъчийри ва министррин кабинетдин членри алатай йисан премияр СВО-дин иштиракчияр ва абурун хизанар куьмекдалди таъминарзавай фондуниз рекье тунай. Сергей Меликова лагьайвал, и такьатар чукIурнавай, барбатIнавай школаяр туькIуьр хъувуниз ва гуманитариядин сифтегьан месэлаяр гьялуниз харжзава. Ада РД-дин гьукуматдал фондунин пулар харжунин гьакъиндай тамам гьахъ-гьисаб авун тапшурмишна.
Вице-премьер Муслим Телякавова Дагъустандин школаяр капремонт авунин кIвалах тешкилнавай гьалдикай хабар гана. Адан гафаралди, алай йисуз Дагъустандин школаяр цIийикIа туькIуьр хъувун патал 3,6 миллиард манат чара авунва. Республикадин 139 школа бинедилай ремонтда.
Малум хьанвайвал, къенин йикъалди дараматрин 80 процент ремонтна акьалтIарнава, амайбурни вахтунда куьтягьун патал эцигунрал алава устIарар, фялеяр желбнава. Муьжуьд муниципалитетда образованидин 15 дарамат саки куьтягьнава. Бинедилай ремонтзавай школаяр цIийи мебелдалдини таъминарда. И кардиз 930 миллион манат чара авунва.
РФ-дин «Национальная система пространственных данных» госпрограмма Дагъустанда уьмуьрдиз кечирмишзавай гьалдикай РД-дин Гьукуматдин Председателдин заместитель, чилин ва эменнидин месэлайрай министр Заур Эминова суьгьбетна. Ада хабар гайивал, ЕГРН-да 243 хуьруьн сергьятрин гьакъиндай делилар тунва. Абурукай анжах цIи план тир 45 хуьруьн чкадал 75 хуьруьн делилар тунва.
«Ихьтин кардиз фикир гун тIалабзава: 2016-йисалай инихъ ЕГРН-да 168 хуьруьз талукь делилар гьатнавай. Им, гьелбетда, лап тIимил тир», — къейдна З.Эминова.
ЕГРН-да хуьрериз талукь делилар тунин карда сифте чкадал Докъузпара, СтIал Сулейманан, Бабаюрт, Къаякент, Хунзах ва Леваши районар ала.
Мярекатдал Сергей Меликова Избербаш шегьердин агьалияр яд авачиз амукьунай администрация ва адан къуллугъчияр хцидаказ критика авуна.
«Эгер куьне агьалияр администрациядин дараматдин вилик кIватI жедай чкадал гъанватIа, ахьтин руководителар низ герек я? За гьеле виликамаз лагьайди тир, гьукуматдин къуллугъчийри агьалияр патал зегьмет чIугуна кIанда. Абур квез ваъ, куьн гьабуруз буржлу я. Вучиз куьне инсанар тахсиркарвалдай хьтин чкадал гъизва? Эгер квез агьалийрихъай кичIезватIа, шегьердиз регьбервал гана кIандач. Инсанрин патав фена, абур дуьз гъавурда туна, администрацияди ийизвай кIвалахдикай ачухдиз лагьана кIанда», — малумарна региондин Кьили.
Гьа са вахтунда Сергей Меликова шегьерда законсуз эцигунар авайди, чилер законсуздаказ чара ийизвайди, пляжни кьацIанвайди къейдна. Ада шегьердин мэриядин кIвалах ахтармишна кIанзавайдакай лагьана.
Идалай гъейри, республикадин регьберди къайдаяр хуьдай органриз Махачкъала шегьердин гзаф квартирайрин кIвалин къаву цIай кьунай тахсирлубуруз дуьз къимет гуниз эвер гана.
Хийир Эмиров
