Алай йисуз Дагъустандин пуд шегьерда ва 28 районда чеб ишлемишунин муддат 10 йисалай алатнавай вири куьгьне автобусар цIийибуралди эвезда. Идан гьакъиндай «ТАСС» чешмеди хабар гузва.

РФ-дин Президент В.Путинахъ галаз гуьруьшмиш хьайи вахтунда РД-дин Кьил В.Васильева алай йисуз чи регионда мектебдин 95 автобус къачун патал кьилди такьатар чара ийидайдакай ихтилатна.

Талукь тир ведомстводин векилди къейд авурвал, республикадин мектебрин улакьар цIийи хъувун патал 2019-йисуз 186,5 миллион манатдилай гзаф пул чара ийидайвал я. Адан гафарай, 31 муниципальный тешкилатдихъ цIийи улакьар къачунин игьтияж ава, санлай къачурла, абуруз 88 улакь герек жезва. Идалайни гъейри, государстводин 7 идарадизни цIийи улакьар чара авун чарасуз я. Абур вири алай йисуз цIийи автобусралди эвезда.

Малум хьайивал, цIийи автобусар 28 райондин, Къизляр, Избербаш ва Махачкъала шегьеррин мектебриз гудайвал я.

«Лезги газет»