Алай йисан 13-августдиз Пятигорскда гьар йисуз тешкилзавай Кеферпатан Кавказдин жегьилрин “Машук-2019” образовательный форумди вичин ракIарар ачухна. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Форумдин тешкилатчияр Кеферпатан Кавказдин федеральный округда авай Россиядин Федерациядин Президентдин патай тамам ихтиярар ганвай векилдин аппарат, миллетрин крарин рекьяй федеральный агентство, жегьилрин крарин рекьяй федеральный агентство ва Ставрополдин крайдин гьукумат я.
2010-йисалай Ставрополдин крайда кьиле тухузвай и важиблу мярекатда Дагъустандин хейлин жегьилрини иштиракзава. Форумдин къенин йикъан мярекатра Кеферпатан Кавказдин регионрин регьберар жегьилрихъ галаз гуьруьшмиш хьана. Дагъустан Республикадин Кьил В.Васильеваз Кеферпатан Кавказдин Федеральный округдин субъектрин милли майданрихъ галаз танишарун патал экскурсия тешкилнавай.
“Машук” форумдин кьилин макьсад Кеферпатан Кавказдин федеральный округдин ва санлай къачурла Россиядин яшайишдинни экономикадин рекьяй ва общественно-политический везифаяр тамамарунин барадай кар алакьдай жегьилрин ва чпихъ гележег авай проектар гвай командаяр сад авун, абур бегьерлу, нетижалу крарал желб авун я.
Мярекатдин сергьятра аваз Владимир Васильев Дагъустандин жегьилрихъ галаз гуьруьшмиш хьана. Жегьил пешекарри РД-дин Кьил экологиядиз, образованидиз ва туризмдиз талукьарнавай чпин проектрихъ галаз танишарна. В.Васильева жегьилрин гьар са теклиф фикирдиз къачуна ва талукь тир ведомствойрин ру-ководителар а проектар уьмуьрдиз кечирмишунин кардал кьетIен гуьзчивал авунин патахъай тагькимарна. Идалайни гъейри, республикадин регьберди жегьилри уьмуьрдин гьар са хиле кьил кутазвай крарин тереф хуьниз талукь яз вилик эцигай суалризни тамам жавабар гана.
ЦIуд лагьай сеферда кьиле тухузвай форум Кеферпатан Кавказдин федеральный округдин мулкара яшамиш жезвай жегьилриз гьукумдин векилрихъ, культурадин машгьур деятелрихъ, тIвар-ван авай спортсменрихъ ва общественникрихъ галаз суьгьбетардай хъсан майдандиз элкъведа.
Форумда образованидиз, культурадиз талукь хейлин программаяр жеда. Гьа са вахтунда мярекатда жегьилри чпин проектрихъ лазимвал авайдини тестикьарда. Чпин хсуси проектар уьмуьрдиз кечирмишдай грантар къачунин конкурсда неинки Россиядин регионрай ва гьакI къунши республикайрай атанвай 2 агъзурдалай виниз жегьилри иштиракда. Форумдал гъанвай лап хъсан проектриз жуьреба-жуьре номинацийрай 300 агъзур манатдив агакьна (гьар садаз) пул гуда.
Дагъустан Республикадин векилри “Машук” форумда гьар йисуз иштиракзава ва абурухъ хъсан нетижаярни жезва. Эгер 2018-йисуз форумдиз чи республикадай 399 кас фенвайтIа (абуру 166 проект гьазурнавай ва грантар къачунин жигьетдайни чи жегьилри СКФО-дин регионрин арада сад лагьай чка кьунай) цIи форумда 500-далай виниз жегьил дагъустанвийри иштиракзава. Шаз, санлай къачурла, республикадин жегьилриз грантрин куьмек яз 18,1 миллион манат ганатIа, цIи и рекъем мадни екеди хьун мумкин я.
Накь форумдин сергьятра аваз Кеферпатан Кавказдин федеральный округдин югъ кьиле тухвана. Ана округдик акатзавай вири регионри чпин яратмишунриз талукь программаяр къалурна.
«Лезги газет»
