«ЧIал раб яни, вучиз квахьна фирай ам?!

ЧIал ветI яни,  вучиз чна кьирай ам?!

Вахт атанва рахадай,

КьатI хьайи сим аквадай.

ЧIал инсан я, чIал инсан я.

Къуй лезгийри хуьрай ам!»

Алатай гьафтеда Мегьарамдхуьруьн рай­ондин Билбил-Къаз­майрин М.Аб­дул­ла­еван тIва­ру­нихъ галай юкьван­ школада хайи чIа­ларин международный­ йи­­къаз талукьарнавай мярекат Лезги халкьдин бажарагълу шаир Алирза Саидова гьеле тахминан зур асирдин вилик лагьай, чпин метлеблувал къенин юкъузни дерин тир и гафаралди  ачухна. 8 ва 10-класс­рин аялрихъ галаз санал дидед чIа­ланни литературадин муаллим Майя Жабраиловади тешкилнавай­ и мярекатда гьакIни РФ-дин умуми­ образованидин гьуьрметлу работ­ник, гзаф йисара и мектебдин ди­ректор­дин везифаяр тама­марай­ ма­тематикадин тежрибалу муал­лим­ М.­Саидова, «Лезги­ га­з­ет­дин» ­экономика­дин отделдин­ редактор­ Ж.Саидовади, шко­­ладин­ тежрибалу муаллимар тир И.Сал­мановади, С.Бейбалаевади, Э.Шам­судино­ва­ди иштиракна.

«Чна гзаф мярекатар тухузва­ чи чIал мягькемдиз хуьн паталди. Вучиз лагьайтIа, акьалтзавай несил, квез аквазва хьи, хайи чIалал артух рахазмач. КIвале, хизанда абур урус чIалал рахаз алахъзава. И гьерекат пашманвал кутадайди я, вучиз лагьайтIа, эгер чна жуван хайи чIал хуьн тавуртIа,  чи халкь, миллетни михьиз квахьу­нин къурхулуви­лик акатда», —  къейдна Майя Арасхановнади, хайи чIал авай гьалдикай ва ам инлай кьулухъ къведай несилрив агакьарун чи буржи тирдакай рахадайла.

8-классда кIел­завай Диана Гьуьсейнханова­ди, Наима Али­е­­­ва­ди, Зулейха­ Аб­дуллае­ва­ди­­,­ Зарият Мацаева­ди, гьакIни 10-классдин ученица­ Оксана­ Гъа­ни­евади лезги халкьдин шаирр­и хайи чIалакай кхьенвай шиирар­, гьа жергедай яз  ви­чин­ ери-бине Билбил-Къаз­май­рилай тир шаир Гъулан­­герек Иб­ра­­гьи­мо­вадин­, хайи чIал хуьнин ре­кье­ гзаф зегьмет чIуг­ваз­вай бажа­рагъ­лу шаир ва композитор Седа­къет Керимовадин эсерар  кIелна.

Мурад Саидовича аялриз неинки жуван чIал хуьнин, гьакIни хайи ерийриз, макандиз  талукь месэлаяр гьялунин кардани активвал къалуруниз, чеб девлетлу ва баркаллу ирсиналди, къагьриманралди машгьур лезги халкьдин векилар тирди садрани рикIелай ракъур тавуниз эвер гана.

«Лезги газетдин» патай мектебдиз са жерге ктабар пишкеш авурдалай кьулухъ Ж.Саидовади милли газет арадал гъайи йисарикай ва халкьдин савадлуви­лин рекье зурба зегьмет чIугур ксарикай, гьакIни газетди къенин юкъуз кьилиз акъудзавай проектрикай, кIва­лахрикай суьгьбетна, гьакI аял­рин суалризни жавабар гана.

8-классда кIелзавай Къизхалум Туьменовади хайи маканди­кай — Билбилхуьруькай вичи кхьенвай шиир кIелна.

Виридуьньядин чIаларин йи­къан сергьятра аваз, мектебда Гъулангерек Ибрагьимовадин 60 йисан юбилейдиз талукь мярекатни, “Халкьдин мецин эсерар” викторинани (5-6-классра)  кьиле тухвана.

Амина  Муслимова