Къе, 5-августдиз, Докъузпара райондин администрациядин заседанийрин залда райондин кьилин везифаяр вахтуналди тамамарзавай Агьмед Агьмедова райадминистрациядин жавабдар къуллугъчийрихъ, хуьрерин поселенийрин кьилерихъ галаз нубатдин совещание кьиле тухвана. Идакай «Лезги газетдиз» райадминистрациядин пресс-къуллугъди хабар гузва.

Совещанидал райадминистрациядин экономикадин отделдин начальник С.Магьмудова налогар кIватIунин, объектар ва чилер актуализация авунин кIвалахдикай куьрелди ихтилатна. Къейд авурвал, къведай йисалай эменнидин кадастрдин къимет тайинарда ва налогарни и системадал асаслу яз кIватIда. С.Магьмудова агьалийри чпин кIвалериз, чилериз госрегистрациядин гьакъиндай тир шагьадатнамаяр («зеленкаяр») туькIуьрунин чарасузвиликайни ихтилатна.

Райондин кьилин заместитель С.Гьажимурадова образованидин идараяр цIийи кIелдай йисаз гьикI гьазур хьанватIа, гьадакай галай-галайвал ихтилатна.

— ЦIаяр кьунин дуьшуьшриз аксивалдай системадин гьазурвилер квачиз, амай ремонтдин вири кIвалахар мектебра акьалтIарнава. Талукь тир пешекаррин комиссия желб авуналди, и йикъара цIай кьуниз аксивалунин тадаракарни вири мектебра лазим тир къайдадик кутада, — лагьана райодин кьилин заместителди.

«Лезги газет»