АДЕТРАЛ АМАЛИН!
Куь веледар, хтуларни мехъерардай дережайрихъ агакьрай лугьудай келимайри гьар садан гуьгьуьлар хкажда. Мехъер авун инсандиз виридалайни гзаф шадвал гъизвай мярекатрикай сад я.
Мехъер — им цIийи хизан кутун, тухумдин ирс давамарунин кам я. Чинра мехъерар гьар жуьреда тухузва. Рушни гада чеб-чпиз акуна, таниш хьун, рикIерин сирер сада-садаз ачухун, лугьун уьмуьрдин важиблу кам я.
Жегьилар ва абурун диде-бубаяр рази хьайила, гададин патай лап мукьвабурукай 4-5 кас итимар, гьакьван дишегьлиярни рушан кIвализ фидай адет я. Гележегдин чамран патай яшдизни башдиз чIехи касди, чеб атунин себебдикай, къавумвал ийиз кIанзавайдакай лагьана, пишкешар гуда. Рушан патай разивал къалурайла, адан тупIухъ, свас тирвилин лишан яз, къизилдин тупIал акалун адет я.
Рушак лишан кутурдалай кьулухъ мехъерин йикъалди адет тир серенжемар, мярекатар мадни самбар ава. Абур гьар са хуьре чпин тегьерда кьилиз акъудзаватIани, метлеб ва мурад сад я — жегьилар эвленмишун, цIийи хизан арадал гъун, абур гележегда гьуьрмет-хатур аваз яшамиш хьун. Мехъерин межлисар кIвале-гьаятда, багъ-бустанда кьиле фидай. Къе хуьруьн чкадани гзафбуру мехъер залра ийизва. Абур концертдиз, шоудиз ухшар жезва.
Гьикьван мешреблудаказ аквадай зул кIватI хъувунвай вахтунда жуван кIвалин вилик дем кутуна ийидай мехъерар!
Гьар са девирдихъ вичин лишанар ава. ЯтIани куьгьне хъсан адетарни квадарна виже къведач. Къуй вири жегьилар бахтлу хьурай!
Райсудин Набиев
