25-ноябрдиз КцIар райондин Манкъулидхуьруьн культурадин кIвале чIехи манидар Физамеддин Гьамидов дидедиз хьайидалай инихъ 100 йис хьуниз талукьарнавай межлис кьиле фена.
Физамеддин (халкьдин арада адаз ФизетI ими лугьудай) 1918-йисуз Манкъулидхуьре Гьамидан хизанда дуьньядал атана. Аял чIавалай музыкадал рикI алаз хьайи жегьилди вичи-вичиз тар, чуьнгуьр ягъиз чирна, халкьдин манияр тамамариз, чIалар кхьиз, абур манийриз элкъуьриз эгечIна.
Манкъулидхуьруьн кьил рехи хьанвай ксари, гьа жергедай яз рагьмет хьайи Себиюлла муаллимди, Несимади, Хийирбалади ва масабуру шагьидвалзавайвал, Физамеддинахъ вичи туькIуьрнавай са шумуд мани авай. Абурукай «Къайибалид лацу Туйгъун» халкьдин арада лап машгьур хьана.
Алатай асирдин 60-йисар КцIар райондин тарихда, гьакIни Къуба патан лезгийрин уьмуьрда Ренессансдин девир яз гьисабиз жеда: и чIавуз мектебра дидед чIалан тарсар кардик кухтазва(абур 1936-йисалай акъвазарнавай), районда лезги радио рахазва, Халкьдин театр, «РикIин гаф» литературадин кIватIал, цIийи ансамблар, композиторар арадал къвезва, хуьруьн чкайра цIийи клубар ачух жезва…
КцIар районда лезги музыка, театр вилик тухунин карда Физамеддин Гьамидован зегьмет зурбади хьана. Ада мел-мехъеррик вичин сенятдин дустар тир Санайилахъ, Зербалидихъ, Белкъидихъ галаз санал иштиракзава. Халкьдин театрдин сегьнедал Имамали Илясовахъ, Экбер Ферзалиевахъ, Нора Алимовадихъ галаз рикIелай тефидай къаматрал чан гъизва. Манидардин гъвечIи руша, са чIавара КцIарин радиодин диктор хьайи Эсмер муаллимди, вичин буба икI рикIел хкизва: “Зи бубади тар хъсандиз ядай. Адаз Бакуда ансамблдик экечIун теклифнай. Хизан районда туна, меркездиз фин адан рикIи кьабулначир. Азербайжан ССР-дин халкьдин артист Фатма Мегьралиевадин тIалабуналди ада чи халкьдин мани «КIанда-кIанда» дуэт хьиз лагьанай».
Лезги манидаррикай сад хьайи Физамеддин Гьамидов гьакIни гъейратдин кIватI тир. Дяведай тахтай стхадин тIвар хуьн патал ада вичин фамилия дегишарнай — Гьамидовакай Куругълиев авунай.
Манидар 1966-йисуз рагьметдиз фена. Ам КцIар шегьердин сурара кучукнава. Аллагьди рагьметрай вичиз!
Манидардин 100 йисан мярекатдал Бакудай, Худатай, Яламадай, КцIарай, къунши хуьрерай гзаф мугьманар атанвай. Ф.Гьамидован уьмуьрдикайни яратмишунрикай доклад В.Гьажиагъаева авуна. Мярекатдал рахай Манкъулидхуьруьн кьил А.Манатилова, «Алам» журналдин кьилин редактор К.Къурбаналиева, шаир Э.Гуьлалиева, хуьруьн ветеранрин советдин кьил П.Магьсимова, манидардин рушари, педагогикадин илимрин кандидат Гь.Мамедова ва масабуру Физамеддин Гьамидова чи медениятда гьихьтин чка кьунватIа, гьадакай ихтилатна.
Вижевай теклифарни гана ксари: КцIарин Лезги драмтеатрдин фойеда «Ф.Куругълиев — 100» кьил ганвай фотомонтаж туькIуьрин, КцIара авай манидардин кIвалин вилик дамахдин кьул алкIурин, хуьруьн мектебда кIелзавай аялрин арада гьар йисуз манияр лугьудайбурун конкурс кьиле тухун ва икI мад.
«Сувар» ансамблдик кваз манияр лугьузвай Роза Гьажимурадовади, Манкъулидхуьруьн культурадин кIвалин директор, манидар Элвин Мегьамедгьуьсейнова, Гуьнай Велихановади, Гьуьрмет Исрафилова, ашукь Нуьсретан хтул жегьил Нуьсрета, нефесдин алатар вижеваз язавай Фейзулла Хаметова ва маса сеняткарри межлис мадни чIагурна. Мектебдин аялри Етим Эминан, К.Абдуллагьан, З.Ризванован, М.Муьшфикьан, К.Келентерлидин, М.Эрзиманован, Р.Гьажимурадовадин шиирар кIелна. Межлисдин эхирдай чкадин гьевескар артистри манидардин уьмуьрдикай гьазурнавай са пердедин тамаша къалурна.
Вагиф Гьажиагъаев
