Дагъустанда 2018-йисан 6 вацран вахтунда гьасилнавай хуьруьн майишатдин суьрсетдин кьадар, алатай йисан гьа и вахтунин делилрив гекъигайла, 1,3 процентдин гзаф ва 22,107 млрд. манатдиз барабар хьанва, хабар гузва РД-дин хуьруьн майишатдин ва недай суьрсетдин министерстводин пресс-къуллугъди.
Кьилди къачуртIа, малдарвилин хиле гьасилзавай якIун кьадар (чан аламаз алцумайла) алатнавай зур йисан вахтунда 0,4 процентдин — 65,7 агъзур тонндив, нек — 1,9 процентдин — 427,1 агъзур тонндив агакьна гзаф хьанва. Какайрин кьадар лагьайтIа, 0,9 процентдин агъуз аватнава — абурун кьадар 108,2 миллион я.
Гьа са вахтунда республикада чан аламаз маса гузвай гьайванрин кьадар зур йисан вахтунда тIимил хьанва — 15,499 агъзур тонндив агакьна (1,6 процент). Маса ганвай нек лагьайтIа, артух хьанва — 59,68 тонн (10,9 процент), какаяр — 26,6 процентдин тIимил (12,092 миллион).
ДатIана гуьзчивилик ква
Дагъустандин лежберри республикадин хуьруьн майишатдин ва недай суьрсетдин министерстводихъ галаз санал региондин хуьруьн майишатдиз зарар гузвай зиянкар цицIерихъ галаз женг чIугун давамарзава.
ИкI, цицIер жагъурун патал хуьруьн майишатдин 314 агъзур гектардин мулкар ахтармишнава, 147,2 агъзур гектардай зиянкарар жагъанва.
Министерстводин пресс-къуллугъди хабар гузвайвал, 119,7 агъзур гектар майданра чилериз химиядин дарманар янава, гьа жергедай яз 59,1 агъзур гектарда — чилин техника, 60,6 агъзур гектарда — авиация желб авуналди.
Республикадин хуьруьн майишатдин чилера зиянкар цицIер аватIа ахтармишунин кIвалах датIана министерстводин гуьзчивилик ква.
«Лезги газет»
