«Мегьарамдхуьруьн район» МР-дин администрациядин пресс-къуллугъди «Лезги газетдиз» хабар гузвайвал, 2003-2004-йисара дидедиз хьайи жегьилрин арада, райондин кьил Ф.Агьмедован призар къачун патал дзюдодай Дагъустан республикадин кIвенкIвечивал патал акъажунар кьиле фена.

РД-да дзюдо машгьур авунин, дзюдодин рекьяй жегьилрин устадвал хкажунин ва Вирироссиядин акъажунра иштиракун патал РД-дин хкягъай командадик къуватлу спортсменар кутунин макьсадралди тешкилнавай спортдин мярекат Советрин Союздин Игит Абас Исрафилован тIварунихъ галай ДЮСШ-да кьиле фена.

Накь, 15-декабрдиз, шад гьалара турнир ачухунин мярекат, райондин кьил Фарид Агьмедован иштираквал аваз, кьиле фена. Кьве йикъан къене (15-16-декабрдиз) 200-дав агакьна Дагъустандин спортсменри бягьсер кьиле тухуда. Кьилди къачуртIа, Мегьарамдхуьруьн, Хив, Дербент, Агъул, Сулейман-Стальский районрай, Белиж поселокдай, Махачкъала ва Каспийск шегьеррай дзюдодал машгъул спортсменри (заланвилин 6 дережадай) иштиракна.

Гъалиб хьайибур ва хъсан чкаяр кьурбур кубокралди, медалралди ва къиметлу савкьатралди къейдна. Идалайни гъейри, акъажунрин сергьятра аваз Мегьарамдхуьруьн райондин кьили виридалайни кьакьан дережайрив агакьнавай спортсменриз премияр гун кьетIна.

«Лезги газет»