Мегьарамдхуьруьн райондин агьалияр патал 2018-йис юбилейдинди я. Мегьарамдхуьруьн райондин администрациядин пресс-къуллугъди хабар гузвайвал, райондин 75 йисан юбилейдихъ галаз алакъалу яз 22-сентябрдиз суварин гегьенш мярекатар кьиле фида.

Район патал лишанлу сувариз кlевелай гьазурвилер аквазва. Алай  вахтунда юбилейдин мярекатрин гьазурвилер акунин сергьятра аваз хейлин кlвалахар кьилиз акъуднава. Кьилди къачуртlа, райондин руководстводи план туькlуьрнава ва адан бинедаллаз гьазурвилер аквазва.

Райондин кьил Ф.Агьмедован теклифдалди райондин кьилин заместитель Гь.Мурадалиева юбилейдин мярекатриз талукь тир гьазурвилерин гьакъиндай тешкиллувилин комитетдин совещание кьиле тухвана.

Совещанидал малум хьайивал, юбилейдин гьазурвилер лазим тир къайдада аваз кьиле физва. Суварин юкъуз райондин гьар са хуьруьн кьилдин майданар тешкилда, спортдин мярекатар кьиле фида, суварин концер тешкилда ва икl мад. Райондин кьил, Москвадай, Санкт-Петербургдай ва маса регионрай къведай мугьманри тебрикдин гафар лугьуда.

Къейдзавайвал, юбилейдин сергьятра аваз хуьруьн майишатдин мекерани тешкилда. Анай райондин агьалийривай базаррин  къиметрилай ужуздай хуьруьн майишатдин продуктар къачуз жеда.

Юбилейдиз талукь яз Мегьарамдхуьруьн райондикай нубатдин ктабни чапдай акъуддайвал я.

«Лезги газет»