ЦIийи йисан вилик Мегьарамдхуьре 60 касдиз чкаяр авай аялрин бахча ачухунин шадвилин мярекат кьиле фена. И имарат “Демография” ва “Образование” милли проектар кьилиз акъудунин сергьятра аваз эцигнавайди я.
Мярекатда РД-дин образованидин ва илимдин министрдин сад лагьай заместитель Ширали Алиева, РФ-дин оборонадин министерстводин военный эцигунрин комплексдин технический заказчикдин генеральный директор Мегьамед Хандаева, райондин администрациядин жавабдар къуллугъчийри, идарайрин, карханайрин регьберри, жемятдин векилри иштиракна.
КIватI хьанвайбурун вилик тебрикдин келимаяр рахай Мегьарамдхуьруьн райондин кьил Фарид Агьмедова и вакъиадихъ район патал важиблу метлеб авайди къейдна. “Имарат ЦIийи, 2020-йисан вилик ачухун лишанлу кар я. Райцентрадихъ яшайишдин метлеб авай ихьтин имаратдин патахъай фадлай игьтияж авайди тир. Гила Мегьарамдхуьре школадилай виликан образование гунин месэла дуьзгуьндаказ гьялдай мумкинвал жеда”, — лагьана Фарид Агьмедова.
«Лезги газет»
