22-23-январдиз ДГПУ-да армспортдай республикадин дережадин акъажунар кьиле фена. Ана Дагъустандин вири районрай лап хъсан 100 спортсменди иштиракна.
«Лезги газетдиз» Кьурагь райондин администрациядин пресс-къуллугъди хабар гузвайвал, вичин ери-бине Кьурагь райондин Ашар хуьряй тир, Россиядин Росгвардиядин къуллугъчи Халикьов Мегьамедвели Жаврудиновича и акъажунра 90 килограммдин заланвилин дережа сад лагьай чка кьуна. Мегьамедвели Халикьов Россиядин спортдин устад, армрестлингдай Вирироссиядин турниррин гъалибчи, грэпплингдай республикадин турниррин призер я.
Мегьамедвели 10 сеферда армспортдай Дагъустандин чемпион я. Алай вахтунда ам армспортдай Россиядин чемпионатдиз гьазур жезва.
Къуй чи ватанэгьлидихъ къуллугъдани, спортдани мадни чIехи агалкьунар хьурай!
«Лезги газет»
