29-июндиз Мегьарамдхуьре «Мегьамед Ярагъви – халкьдин зурба ирс» лишандик кваз ислягьвилинни разивилин гегьенш форум кьиле фида. Идакай «Лезги газетдиз» Мегьарамдхуьруьн райондин администрациядин пресс-къуллугъди хабар гана.
Чешмеди къейдзавайвал, форум РД-дин милли сиясатдин ва динрин крарин рекьяй министерстводи Мегьарамдхуьруьн райондин администрациядихъ галаз санал, РД-дин муфтиятдини тереф хуьналди, тешкилнава.
Форумдин макьсад жемиятдин арада ислягьвал хуьн, миллетрин арада авай алакъаяр хъсанарун, халкьдин арада руьгьдинни ахлакьдин тербия мягькемарун, Дагъустанда экстремизмдинни терроризмдин идеологиядиз аксивалун я. Форумдин кIвалахда гьукумдин векилри, Москвадай, Санкт-Петербургдай алимрин дестеди, дагъустанви тарихчи алимри, республикадин вири шегьеррин ва районрин диндин къулугъчийри, мукьваллай къецепатан уьлквейрай хкведай мугьманри ва масабуру иштиракда.
Тешкилатчийри форумда иштиракиз кIани вирибуруз теклифзава.
«Лезги газет»
