Мегьарамдхуьруьн райондин мектебрин къваларив гатун тIатIилрин йикъара аялри ял ядай лагерар ачухнава. Киш ва гьяд квачиз, амай йикъара аялривай экуьнилай нисиналди лагерра акъвазиз жеда. И гьакъиндай «Лезги газетдиз» муниципалитетдин администрациядин пресс-къуллугъди хабар гузва.

Ибурулай гъейри, райондин кьил Ф.Агьмедован тапшуругъдалди жегьилар спортдал машгъул хьун патал махсус спортмайданарни ачухнава.

Къейдзавайвал, райондин образованидин управленидин разивални аваз, мектебрин къваларив тешкилнавай гьар са лагерь патал кьилди программаяр туькIуьрнава ва абур уьмуьрдизни кечирмишзава.

Анра аялриз кьве сеферда тIуьн гузва, къугъвадай, рикI аладардай жуьреба-жуьре мярекатар ва масабур тешкилзава; ана яратмишунин рекьяй аялрихъ авай алакьунарни мумкинвилер винел акъудзава.  Ял язавай аялар муаллимрин ва вожатыйрин кьетIен гуьзчивилик жезва.

«Лезги газет»