Ахцегь райондин Къурукаларин хуьре 18-августдиз шейх Мегьамед Ярагъвидин гьуьрметдай турнир ва межлис кьиле фида. Идакай «Лезги газетдиз» Ахцегь райондин администрациядин жегьилрин парламентди хабар гузва.
Алимдин, шейхдин тIварунихъ галай мярекатар сятдин нянин пудаз гатIундайвал я. Сифте – спортдин мярекатар, гуьгъуьнлайни нашидар тамамарунин ва алимрин межлис тешкилда. Кьилди къачуртIа, спортдин мярекатрин сергьятра аваз иштиракчийри пут гадарунай, гиря хкажунай, чIемерукдай хьел ягъунай, цIил ялунай чпин алакьунар къалурда, къуватар алцумда.
Гъалибчийриз пулдин пишкешар гуда. Сад лагьай чкадай 3 агъзур манат пул гуда, кьвед лагьай чкадай – 2 агъзур, пуд лагьай чкадай – 1 агъзур.
Алава хъийизвайвал, Къурукаларин мектебдин майдандал кьиле фидай мярекатра ашкъи авай вирибурувай иштиракиз жеда.
«Лезги газет»
