Алай йисан 16-августдиз Мегьарамдхуьруьн райондин кьил Фарид Агьмедов вичин кабинетда машгьур спортсмен — тайский боксдай са шумуд сеферда дуьньядин чемпион, алай вахтунда Дубайда яшамиш жезвай Абдулмалик Гьажиевахъ галаз гуьруьшмиш хьана. Дуствилин гьалара кьиле фейи гуьруьшдал А.Гьажиева вичин гъвечIи Ватан — Мегьарамдхуьруьн район — эхиримжи йисара Кьиблепатан Дагъустандин спортдин зурба майдандиз элкъвенвайдал вич пара кьадар шад тирди лагьана.
— Чи девирда, чун аялар тир вахтара, спортдин рекье — рингдал агалкьунар къазанмишун чи мурад тир. Къенин юкъуз чи ватандашри гъвечIи Ватан, район, чи Дагъустан спортдин республика яз адалай къецени машгьур авунал за кьадарсуз дамахзава. Зун гзаф шад я, къенин юкъуз районда гьар са аялдиз — спортдал, гьар са агьалидиз физический культурадал машгъул жедай къулай вири шартIар хьунал. Спортдин месэлайрин гъавурда авай инсан хьуниз килигна, за Квез, Фарид Загьидинович, районда спорт вилик тухунай сагърай лугьузва. Шаксуз, спортди ва физический культуради сагълам уьмуьр кечирмишун пропаганда ийизва. Гьелбетда, жегьилри чпин вахт куьчейра ва компьютеррин кIане — ваъ, спортзалра акъудун лазим я, — къейдна спортсменди вичин рахунра.
— Абдулмалик еке ватанперес яз хьун заз лап хуш я. Спортсмен патал и еридихъ еке метлеб ава, гьикI хьи, акьалтзавай несилдиз чна и кардилай чеше къачуниз эвер гузва, — къейдна райондин кьил Фарид Агьмедова.
Гуьруьшдал спортдикай, райондин спортсменри къазанмишнавай агалкьунрикай, жегьилрин итижрикайни рахана.
РикIел хкин: WMC версиядалди пуд сеферда дуьньядин чемпион, Pkhuket версиядалди дуьньядин чемпион, Тайланддин Кубокдин сагьиб, пуд сеферда Дагъустандин чемпион — ибур Абдулмалик Гьажиева спортда къазанмишнавай агалкьунрикай са тIимилбур я.
Абдулмалик алай вахтунда Дагъларин уьлкведивай яргъа — Дубайда — яшамиш жезватIани, ада вичин гъвечIи Ватан садрани рикIелай алудзавач. Ада ана тренер яз зегьмет чIугвазва, вичин чирвилер ва тежриба спорсменрин акьалтзавай несилдал агакьарзава.
Гуьруьш рикIел хуьнин лишан яз Мегьарамдхуьруьн райондин кьили мугьмандиз машгьур алим, диндин просветитель, шейх, дуьньядин мусурманрин арада вичин авторитет екеди тир Мегьамед Ярагъидин портрет пишкешна. Немсерин алим Гакстгаузена вичин кхьинра къейд авурвал, “Ярагъидин чирвилери, акьул-камалди халкьар руьгьдин жигьетдай савадлу авунин ва тупламишунин карда тарихдин метлеб авай роль къугъвана”. Ярагъидин тIвар Меккеда, пак накьварал, къванцел атIанва. Абдулмалик Гьажиева райондин кьилиз пишкешдай чухсагъул малумарна ва “Ярагъидин портрет багьа ва къиметлу ядигар яз Дубайдиз хутахда, адан тIвар виринра пак я” лагьана.
Фарид Агьмедова жегьилри ихьтин затIариз къимет гун ва абурал дамахун шад жедай кар тирди къейдна.
«Лезги газет»
