И йикъара чав чIулав хабар агакьна: 64 йисан яшда аваз, вичин кьетIен бажарагъ, яратмишунрин хатI, еришар ва ерияр фадлай машгьур хьанвай художник-скульптор, РФ-дин художникрин Союздин член Агьмад Адилович Адилов рагьметдиз фена.
А.А.Адилов 1954-йисуз Докъузпара райондин Миграгърин хуьре алимдин хизанда дидедиз хьана. Хуьре юкьван школа, Махачкъалада художественный училище, Москвада В.Сурикован тIварунихъ галай художественный институт акьалтIарна.
Вичин алакьунар Агьмед Адиловича гьеле мектебда амаз къалурзавай. Ада миграгъви тIвар-ван авай художникрин — Гьейбат Гьейбатован, Эмирбег Керимован рехъ давамарна. Гуьзел рангаралди чIугунвай адан “Шалбуз дагъ”, “Гьажи-Давуд”, “Дагъдин хуьр”, “Пакаман ярар” ва маса шикилар республикадин, вирисоюздин, дуьньядин выставкайрани эцигна.
Эхиримжи вахтунда ам чи тIвар-ван авай алимрин, шаиррин суьретар къванце, ракьа тунал машгъул тир. Алибег Фатаховаз туькIуьрнавай бюст Цмурдал, хуьруьн майдандал хкажнава.
Художникдин рикIе мурадар мадни гзаф авай. Амма залум ажалди адаз а мумкинвал ганач.
Чна рагьметлудан хизандиз, мукьва-кьилийриз, чидай вирибуруз, дериндай яс чIугуналди, башсагълугъвал гузва.
Агьмад Адилович Адилован экуь къамат чи рикIелай садрани алатдач.
«Лезги газетдин» редакциядин коллективди рагьметлудан хизандиз, вири мукьва-кьилийриз башсагълугъвал гузва.
