Гьасанагъа  Мурсалован  манийрин ван тахьай кас бажагьат ава. Бажарагълу композитордин тIвар вири республикада машгьур хьана. Рагьмет­диз фена къад йисалай виниз вахт алатнава­тIани, лезги мани хуш тир инсанрин рикIера Гьасанагъа Мурсаловича лайихлу чка кьунва. Композитордин тIвар, адан манияр вири халкьдиз сейли ятIани, пешекарриз адан уьмуьрдин ва яратмишунин рехъ са акьван малум туш.

РД-дин искусствойрин лайихлу деятель Гьасанагъа Мурсалович Мурсалов 1935-йисан 1-июлдиз Ахцегьа лежбердин хизанда дидедиз хьана. Хайи хуьруьн 1-нумрадин мектеб акьал­тIа­рай­далай кьулухъ гележегдин композиторди Советрин Армиядин жергейра къуллугъна. Гуьгъуьнилай ам Дагъустандин хуьруьн майишатдин институтдин зоотехнический факультетдиз гьахьна.

Гьа и йисуз ада вичин яратмишунрин кIвалахни башламишна. ИкI,  Д. Абдуллаеван чIалариз кхьей “Комсомол” тIвар алай сад лагьай манидиз экуь дуьнья акуна.

1962-йисуз институт акьалтIарайдалай кьулухъ Гь. Мурсалова Ахцегь районда зоотехникви­ле, 1969-1972-йисара кьилин зоотехниквиле кIва­лахна.

1972-йисалай ам райондин “ЦIийи дуьнья” газетдин редакцияда журналиствилин кIвалахал элячIзава ва, жергедин корреспондентдилай кьилин редактордал кьван хкаж хьуналди, композиторди  1979-йисалди гьана кIвалах­зава.

Музыкант ва композитор хьуниз килигна, Гь.Мурсалов­ за­оч­нидаказ Махачкъаладин Г. Гьасанован тIва­рунихъ галай музыкадин училищедиз гьахьзава. 1979-1985-йисара ада Ахцегьрин музыкадин мектебдин директорвиле кIвалахна.

1985-йисуз ам мад райондин газетдин редакциядиз хъфизва ва ана редактордин заместителвиле, 1997-2001-йисара кьилин редакторвиле кIва­лахзава.

Композитор Гь.Мурсалов 200-далай виниз манийрин авторни я. Абурун арадай чавай Ш.-Э. Мурадован (“До­къузпара”, “Ди­де”, “Буба”), Къ. Межидован (“Цуьк­верин сувар”, “Умуд”), Р. Гьамзатован (“Ба­ку”),            М. Атабаеван (“Моск­вадиз салам”), А. Саидо­ван (“Коммунистар”, “Маякрин мани”, “Маяк Саимат”) ва гзаф маса шаиррин чIа­лариз кхьенвай манийрин тIварар кьаз жеда.

1989-йисуз  ДАССР-дин Верховный Советдин Президиумдин Указдалди Гьасанагъа Мурсаловаз “Дагъустандин искусствойрин лайихлу деятель” лагьай тIвар гана.

Гьасанагъа Мурсалов 2001-йисан 29-сентябрдиз, 66 йисан яшда аваз, рагьметдиз фена. Композитордин тIварцIихъ Ахцегьа са куьче гала.

Эдуард Ашурагъаев