Сулейман-Стальский райондин кьил Нариман Абдулмуталибова НуьцIуьгърин ва Сийидрин хуьрера яшайишдин кIвалери цIай кьур дуьшуьшра ви­кIегьвал ва дирибашвал къалурай инсанар кьабулна, абурув пишкешар вахкана. ИкI, цIай хкадарунин карда кьетIен гьалара къалурай жуьрэтлувиляй чухса­гъулдин чарариз Саратов шегьердин “Нордекс” ООО-дин къуллугъчи нуьцIуьгъви Расим Тагьирбегов (ам ЦIийи йисан суваррин йикъара хуьруьз отпускдиз хтанвай), Сийидрин хуьряй тир Сефербег Давудов, Ариф Мисриханов ва Максим Мусаханов ла­йихлу хьана.

— Лап хаталу дуьшуьшра куьне дирибашвал, дагъвийриз хас тир ватанпересвал къалурна, цIай хкадарунин карда и рекьяй  къуллугъдин работникриз еке куьмек гана. Чанни къурбанд ийиз гьазур тир куь гьерекатар себеб яз, кье­тIен гьалара мусибатдин крарикай хуьз алакьна. Ихьтин куьмекдай чун квез буржлу я. Чухса­гъул лугьуналди, чаз квехъ мягькем сагъламвал, хизанда бахтлувал, берекат ­хьана кIанзава, — лагьана Нариман Абдулмуталибова абурухъ элкъвена.

Гуьруьшдал халис дагъвийрин къилих къалурай Расим Тагьир­беговаз, Сефербег Давудоваз, Ариф Мисрихановаз ва Максим Мусахановаз чухсагъулдин, разивилин келимаяр райадминист­рациядин ГО-дин ва ЧС-дин отделдин начальник Тарлан Султанагьмедова, Кьасумхуьруьн администрациядин кьил Далгат Бабаева, общественный хатасузвал хуьнин рекьяй райадминистрациядин ­кьилин заместитель Абуталиб Фатулаева ва ма­са юлдашрини лагьана.

И мярекатдал рикIел хкайвал, НуьцIуьгърин хуьре Хидир ва Назимат Гьуьсеналиеврин кIвали цIай 3-январдин нянрихъ кьуна. ЧIуру и дуьшуьш газдин пичинин турба себеб яз арадал атана. КIвале аяларни авай, абур къугъунрал машгъул тир. Са кIвалелай цIай вири дараматдиз чкIана. Хабар гана, тади гьалда атай МЧС-дин пешекарар цIай хкадарунив эгечIна. И карда абуруз хуьруьнвийрини екедаказ куьмекна. Расим Тагьирбегова еке жуьрэтлувал къалурна. Шехьзавай аялрин ван хьайи ам, вичин уьмуьр хаталувилик кутуна, кьилел кьежирнавай рух вегьена, кузвай кIва­лиз гьахьна, 6 аял анай къецел акъуд­на.

— Ихьтин дуьшуьшда заз жувакай фикирдай мажал авачир, цIун хурай аялар акъудна кIанзавай, — лагьана гуьруьшдал, вичиз гайи суалдиз жаваб яз, Расим Тагьирбегова.

Гуьруьшдал Сийидрин хуьре Шамсудин Алисултанован кIвале­ра цIай кьунин дуьшуьшдикайни рахана (8-январдиз). Авай делилралди, чIуру дуьшуьш газдин пич дуьз та­хьун себеб яз арадал атана. И кIвалера хъуьтIуьн вахтунда касни яшамиш жезвач, иесияр кIвализ суваррин йикъара хтанвай. Абур пичина цIай амаз хъфена. ЦIун ялавар къуншийриз акуна, абуру кIва­лин иесийриз ва цIаяр кьуникай къутармишдай къуллугъдиз хабар гана. Махсус  пуд машиндин ва инсанрин куьмекдалди цIай хкадарна. Кьилди къачуртIа, хуьруьнвияр тир М.Мусаханова, С.Да­вудова ва А.Мисриханова иллаки дирибашвал къалурна. Абурун, гьакIни куьмекдиз атай маса хуьруьнвийрин чалишмишвал, гьерекатар себеб яз, эменнидин са пай къутармишиз алакьна.

Райондин администрацияда кьиле фейи гуьруьшдал рахай жавабдар ксари   кузвай кIваляй, цIун ялаврайни ажалдин къармахрай ругуд аял акъудай Расим Тагьирбе­гов гьукуматдин шабагь гун патал къалурунин теклиф гана. Райондин кьили и теклифдин тереф хвена ва райадминистрациядин талукь къуллугъриз герек документар гьазурунин, абур Дагъустан Республикадин гьукуматдиз агакьарунин тапшуругъ гана.

Нариман Абдулмуталибова мадни алава хъувурвал, санлай лезги халкьдиз, вичиз гьахълудаказ арифдаррин, камалэгьлийрин, кьегьал рухвайринни баркаллу рушарин макан лугьузвай СтIал Сулейманан райондин агьалийриз  за­хавал, мердвал, кIеве авайдаз куьмекдин гъил яргъи авун ва ихьтин маса ерияр хас я. НуьцIуьгъа ва Сийидрин хуьре бедбахтвилин дуьшуьшар хьайила, и кар мад сеферда тестикь хьана. Лугьудайвал, игитар яз хазвайди туш, игитар жезвайди я.

Расим Тагьирбегов, Сефербег Давудов, Ариф Мисриханов ва Максим Мусаханов хьтин кьегьал рухвайрал райондин агьалийри дамахзава. Халис дагъвийрин къилих авай абуруз аферин, баркалла!

Хазран Кьасумов