Алай йисан 2-февралдиз Кьасумхуьрел Дагъустандин Кьиблепатан территориальный округдик акатзавай муниципальный шегьеррин ва районрин пресс-къуллугърин векилрин семинар-совещание кьиле фена ва анал малуматрин (информационный) сиясат уьмуьрдиз кечирмишунин менфятлувал хкажунин месэлаяр веревирд авуна.
Мярекатда Сулейман-Стальский райондин кьил Нариман Абдулмуталибова, адан сад лагьай заместитель Лацис Оружева, райондин информагентстводин руководителди ва адан заместителри, Агъул, Ахцегь, Дахадаев, Дербент, Докъузпара, Къайтагъ, Кьурагь, Мегьарамдхуьр, Рутул, Табасаран ва Хив районрин, Дербент, Дагъустандин Огни шегьеррин пресс-къуллугърин регьберри ва гьакIни республикадин СМИ-рин векилри иштиракна.
Мярекат тешкилайди РД-дин Кьилин ва Гьукуматдин Администрациядин малуматрин сиясатдин управление я. Нариман Абдулмуталибова мярекатдин тешкилатчияр, иштиракчияр тебрикна ва муниципалитетрин малуматрин сиясат дуьз тешкилунихъ еке метлеб авайди къейдна.
Семинар-совещание РД-дин Кьилин ва Гьукуматдин Администрациядин малуматрин сиясатдин управленидин начальник Рашид Акавова ачухна ва ада республикадин мулкуна сад тир малуматрин сиясат вилик тухунин цIийи къайдаяр ва рекьер арадал гъана кIанзавайдакай лагьана.
Р. Акавова коронавирусдин тIугъвалди халкьар гъарикIарнавай вахтунда республикадин СМИ-ри тухузвай важиблу кIвалах къейдна. Талукь месэладикай агьалияр вахтунда ва гежел тевгьена хабардар авунилай гзаф инсанрин уьмуьрни, жемятдин пайгарвални, абадвални аслу я. Идахъ галаз сад хьиз, республикадин СМИ-ри милли проектар ва государстводин программаяр уьмуьрдиз кечирмишзавай гьалдикай, гьукумдинни жемятдин яшайишдин вири къатарин арада ачух рахунар арадал гъуникай вахт-вахтунда кхьизва.
Сулейман-Стальский райондин имформагентстводин регьбер Агьмед Гьуьсейнова семинардин иштиракчияр агентстводик акатзавай къурулушрин кIвалахдихъ галаз танишарна.
Семинар кьиле физвай вахтунда хабарар, малуматар гудайла, умуми къайдайрихъ галаз кьунин, тайин кIелзавайбурун ва яб акалзавайбурун итиж артухарунин ва гьакIни нагьакьан, тапан малуматриз акси технологияр кардик кутунин важиблувал къейдна.
РД-дин Кьилин ва Гьукуматдин Администрациядин малуматрин сиясатдин управленидин гьукумдин органрихъ ва муниципалитетрин пресс-къуллугърихъ галаз алакъа хуьзвай отделдин начальник Аида Изиевади малуматар гунин къайдайрикай, республикадин малуматрин сиясатдин рекьяй управленидихъ галаз санал кIвалахунин рекьерикай вичин фикирар лагьана ва муниципалитетрин пресс-къуллугъриз хабаррин “Яндекс. Новости” агрегаторда контентар вилик тухуниз эвер гана.
РД-дин “Координационный информационно-культурный центр” ГБУ-дин регьбер Мухтар Амирова арадал гъизвай контентдин менфятлувал хкаждай алатар раижна. Машгьур соцсетрай (Telegram ва TikTok) итижлу малуматар, хабарар гудайла герек къведай теклифарни гана.
Мярекатдин иштиракчийрив тешкилатчийриз гайи хейлин суалрин гьакъиндай талукь жавабарни агакьна. Семинардин эхирдай Рашид Акавова ЮТО-дин муниципалитетрин пресс-къуллугърин векилрихъ информациядин важиблу хилен кIвалахда агалкьунар хьана кIанзавайдакай лагьана.
Алай вахт жуьреба-жуьре технологийрин, техникадин, информациядин такьатрал гьалтайла акьван йигинди, аламатдинди хьанва хьи, эгер виликдай агьалийрив хабарар радиодай, газетрай ва телевиденидай агакьзавайтIа, къе социальный сетар лугьудайбур майдандиз акъатнава. Ихьтин шартIара СМИ-рин такьатри девирдин истемишунриз жаваб гана кIанзава. Чи йикъара информациядин алемда интернетди кьетIен чка кьунва. Гьавиляй чакай гьар садаз адакай менфят къачуз чир хьун лазим я.
Нариман Ибрагьимов
