Багъманчивал, майвачивал, магьсулдарвал, уьзуьмчивал хьиз, Сулейман-Стальский райондин агропромышленный комплексда малдарвални кар алай, менфятлу ва вилик физвай хилерик акатзава. Малдарвилел асул гьисабдай вилик йисара са артух ишлемиш тийиз хьайи дагъларин мулкара машгъул жезва. Районда кар алай хилер, гьабурукай яз малдарвални вилик тухудай яргъал йисарин муниципальный программаяр кардик ква.
Алатай йисуз районда, план 1404 тонн яз, 2635 тонн як ва план 12005 тонн яз, 13120 тонн нек, 72,1 тонн сар гьасилна.
Малдарвилин хел вилик финик “Горец”, “Агро-Стал”, “Сайтар” ООО-ри, “Манатилов М.М.”, “Кадиров В.К.”, “Ахмедов Ф.С.”, “Айвазов Айдар”, “Фазилов М.М.” КФХ-ри еке пай кутазва.
Малдарвилел машгъул майишатриз, кьилдин ксариз гьукуматдин, райондин администрациядин ва хуьруьн майишатдин управленидин патайни куьмек ава. ИкI, 2016-йисуз “Ахмедов Ф.С.” КФХ-ди “Развитие семейных животноводческих ферм” программадай 5 миллион манат грант, хиперин ва цIегьерин кьадар артухарун патал райондин 4 майишатди 878,8 агъзур манатдин кьадарда аваз субсидияр, “Агро-стар” программадай малдарвал вилик тухун патал 3 КФХ-ди 8483,9 агъзур манатдин, 2013-2019-йисара малдарвал вилик тухунай кIвалах цIийиз башламишзавай 27 фермервилин майишатди 2,95 миллион манатдин, 2014-2018-йисара 4 КФХ-ди гьарда 10 миллион манатдин кьадарда аваз хизандин малдарвилин фермаяр вилик тухунай грантар къачуна.
— Районда малдарвал вилик тухуник, кьилди къачуртIа, мал-къарадин, лапагрин кьадар артухаруник, гьасилзавай продукциядин кьадар йисалай-суз гзаф хьуник инвесторри тешкилнавай майишатри еке пай кутазва, — лугьузва райондин хуьруьн майишатдин ва суьрсетдин управленидин начальник Мегьамедзагьид Бабаева. — Гьа са вахтунда, ихьтин майишатри малдарвал вилик тухунин рекьяй федеральный ва республикадин кар алай программайрани иштиракзава. Идалайни гъейри, чи управленидин пешекарри грантар къачун патал комиссиядиз ракъурдай документар гьазурунин карда алатай йисуз фермервилин кIвалах башламишай 2 майишатдиз ва хизандин са фермадиз куьмекар гана, абуру грантарни къачуна.
Районда малдарвилин хиле инвесторри пулунин такьатрихъ арадал гъанвай майишатар са шумуд ава. И кIвалах давам жезва.
Хазран Кьасумов
