Чи ватанэгьлияр — гьар сана
Бакуда яшамиш жезвай чи ватанэгьли Намик Зейнаддинович Чырыеван ватан Азербайжандин Исмаиллинский райондин Къалажухрин хуьр я. Малум тирвал, и тIвар алай хуьрер Дагъустандин Докъузпарада, Азербайжандин КцIар райондани ава.
Намик 1980-йисан 4-ноябрдиз Исмаиллинский райондин Къалажухрин хуьре дидедиз хьана. 1998-йисуз мектеб тафаватлудаказ куьтягьай ам, агалкьунралди имтигьанар вахкана, БГУ-дин (Бакудин госуниверситет) теологиядин факультетдик экечIна. Вузда кIелдай чIавуз ам Туьркиядин Измир шегьердизни ракъурна, ана машгьур вузрикай сана йисан къене чирвилер артухарна. 2003-йисуз БГУ куьтягьай савадлу жегьилди илимдал машгъул хьун кьетIна. ИкI, ам Азербайжандин илимрин милли академиядин гъилин хатIарин институтда аспирантурадик экечIна. Теологиядай диссертация хуьналди, илимдин имтигьанрайни ам агалкьунралди экъечIна. Гуьгъуьнлай ада са кьадар вахтунда басмадин изданийрин хиле кIвалахна.
Намик Зейнаддиновича алай вахтунда динрин тешкилатрин хиляй Азербайжан республикадин гьукуматдин комитетда кIвалахзава.
Жегьил алимди илимдин кьве ктабни чапдай акъуднава. Ам хейлин макъалайрин авторни я. Лайихлувилелди кьилиз акъудзавай кIвалахдиз, илимдин рекье къазанмишнавай агалкьунриз килигна, 2019-йисуз адаз Азербайжандин президентдин къарардалди медаль гана.
Гьина аватIани, къуй чи гьар са ватанэгьлидихъ чIехи агалкьунар хьурай!
«Лезги газет»
