И йикъара Дагъустандин районра республикадин госфилармонияди тухузвай “За ислягьвал хкязава” серенжемдин сергьятра аваз мярекатар кьиле физва. Идахъ галаз алакъалу яз, гьам школьникарни жегьилар ва гьам еке яшара авай инсанар патал машгьур артис­три ва Даггосфилармониядин коллективри иштиракзавай концертар тешкилзава. И серенжем “Дагъустанда терроризмдин идеологиядиз аксивалунин комплексный прог­раммадин” сергьятра аваз РД-дин культурадин Министерстводи тереф хуьналди тухузва.

ИкI, 30-мартдиз Ахцегьа халкьдин музыкадин “Макъам” ансамбл­дин, гьакI Даггосфилармониядин машгьур солистар тир Диляра Надыровадин, Жаклинадин, Хадижат Жамалдиновадин, Пьер Айджодин ва масабурун иштираквал аваз гегьенш программадикай ибарат тир концерт кьиле фена. КIватI хьанвайбурун вилик “Ахцегь район” МР-дин администрациядин векил Шимсидин Арухов рахана.

— Малум тирвал, искусстводи гьамиша мергьяматлувилин ва инсанпересвилин фикирар машгьурзава. Къе чна тухузвай серенжемдин мурадни, музыкадин ва шииратдин кьакьан чешнейрихъ эл­къуь­налди, жегьилрин фикир алай аямдин хци месэлайрал, терро­ризм­ни экстремизм ва гуж гъалиб авун кьабул тавунал желбун я, — лагьана ада.

Къейд ийин, им “Макъам” ан­сам­бл­ди Ахцегьа кьиле тухвай сифте кон­церт я. Адан художест­вен­ный ру­ко­водитель — Ахцегьрин музшколадин тербиячи Шамиль Шерифалиев. Вич тешкилай йикъа­лай инихъ и ансамблди Дагъустанда государстводин филармонияди тешкилзавай вири метлеблу­ проектра иштиракзава. Аник квай му­зыкантар меж­д­ународ­ный ва Россиядин конкурсрин лауреатар тир Шамиль Шерифалиев (тар), Гуьлнара Гьайдарова (флейта, туьтек), Гьажи Саидов (гитара) ва Эльмар Шерифалиев (кахон, дойра, нагъара) я. Концертдин прог­раммадик гьар жуьре жанрайрин нумраяр квай. Инал и музыкантрин яратмишунрин цIийи терефарни малум хьана. Мярекатдин сифте паюна Дагъустандин композиторрин музыкади ва халкьдин авазрин вариацийри ван авуна. Ансамбль патал обработкаяр ва аранжировкаяр ансамблдик квай музыкантри чпи туькIуьрзава. Ансамблдин ва артистрин гьар са экъечIун тамашачийри гурлу капар ягъуналди къаршиламишна.

Дашдемир Шерифалиев