СтIал Сулейманан районда салан майваяр, кьилди къачуртIа, помидорар алатай асирдин 70-80-йисарилай инихъ гьасилзава. Виликдай хуьруьн майишатдин карханайри, арендаторри ва кьилдин ксари, санлай къачурла 800-1000 гектарда помидорар цазвай. Виликан “Аламишинский”, “Зардиянский” совхозрин, “Герейхановский” совхоздин Чуьхверхуьрел кардик квай куьмекчи майишатдин саларбанрин агалкьунар республикадилай яргъарани машгьур тир.
Эхиримжи йисара районда карханайри ва арендаторри помидорар ачух майданра лап тIимил гьасилзава. И кардал, асул гьисабдай, теплицайрин майишатар машгъул я. Кьилди къачуртIа, ихьтин майишатар ДаркIуш-Къазмайрал, ЦIийи Макьарал, Эминхуьре, Герейханован хуьре, Кьасумхуьрел, Кьулан СтIалрин калун участокда, дагъдин Векьелрин хуьре, гъвечIи теплицаяр маса хуьрерани кардик ква. Санлай къачурла, районда теплицайрин майишатри 11 гектардилай виниз майданар кьунва.
— Районда теплицайрин майишатрин кьадар ва абуру помидорар, маса няметар битмишарзавай майданар къвердавай артух жезва, — лугьузва райондин хуьруьн майишатдин ва суьрсетдин управленидин начальник Мегьамедзагьид Бабаева. — Теплицаяр хуьруьн майишатдин карханайри, инвесторри ва кьилдин ксарини кутазва. Ихьтин майишатрихъ кьетIенвални ава: абуру агьалияр йисан кьиляй-кьилиз таза, хъсан еридин помидорралди, афнийралди, чичIекралди ва маса няметралди таъминарзава.
Теплицайрин майданар хьиз, районда кIватI хъийизвай салан майвайрин кьадарни йисалай-суз артух жезва. ИкI, алатай йисуз районда 34804 тонн салан майваяр кIватI хъувуна. Алай йисуз 35 000 тонндилай тIимил тушиз салан майвайрин бегьер вахчуник умуд кутунва.
Хазран Кьасумов
