18-майдиз РД-дин Кьилин везифаяр вахтуналди тамамарзавай Фёдор Щукина РФ-дин Госдумадин сагъламвал хуьнин рекьяй кардик квай Комитетдин председателдин сад лагьай заместитель Бадма Башанкаевахъ галаз гуьруьш кьиле тухвана. Абуру республикадин агьалияр патал виридалайни важиблу месэлайрикай сад тир здравоохраненидин хел вилик тухун веревирдна.
Ф.Щукинни Б.Башанкаев Дагъустандин медидарайра цIийи технологияр кардик кутунин, инфраструктура цIийи хъувунин, иллаки яргъа авай дагълух хуьрера медицинадин рекьяй къулай шартIар тешкилунин гьакъиндай икьрар хьана.
Гуьгъуьнлай Б.Башанкаев республикадин Вишневскийдин тIварцIихъ галай клиникадин духтурханадиз мугьман хьана. Ада идара дурумлудаказ вилик физвайди къейдна ва Ожоговый центрадин кIвалахдиз виниз тир къимет гана. Адан фикирдалди, и центрадиз межрегиональный дережа гудай вахт алукьнава.
И юкъуз Б. Башанкаев гьакI республикадин онкологиядин центрадин кIвалахдихъ галазни таниш хьана.
РД-дин здравоохраненидин министерстводин пресс-къуллугъдин делилралди, онкоцентрада алай аямдин технологийрикай гегьеншдиз менфят къачузва. И кар себеб яз, эхиримжи йисара рак азар квайди сад лагьай стадияда винел акъудай дуьшуьшар 4 сеферда артух хьанва, и азардик са йисан къене рекьизвайбурун кьадар – 4 сеферда тIимил. Чешмеди гьакIни хабар гузвайвал, мукьвара республикадин духтурханайрив 12 флюорограф, компьютеррин 5 томограф ва 7 МРТ агакьдайвал я.
Йикъан кьвед лагьай паюна РД-дин здравоохраненидин министерствода СКФО-да онкологиядик начагъбуруз медицинадин рекьяй гузвай куьмек мадни хъсанарунин ва ивидихъ галаз алакъалу азарар сагъарунин месэлайриз талукьарнавай совещание кьиле фена.
Агьмед Магьмудов
