Кьурагь райондин къишлахрал алай майишатра гад агудунин кIвалахар башламишнава. И кIвалахар гьикI кьиле физватIа ахтармишун патал “Кьурагь район” муниципальный тешкилатдин кьил Замир Азизов, райондин хуьруьн майишатдинни чилерин алакъайрин отделдин начальник Абдул Фаталиев ва и отделдин кьилин пешекар Нариман Мисриев Малакент хуьре авай “Кутульский” СПК-ди зулун техил кIватI хъийизвай чкадал фена.
Къизгъиндаказ кIвалах кьиле физвай анал техил хуьдай чкаяр туькIуьрнавай.
А.Фаталиева чаз малумарайвал, районда вири санлай 700 гектардин майданра зулун магьсулар цанвай. Гьаваяр кьурагьбур хьун себеб яз, 200 гектарда авай магьсулар терг хьана, алай вахтунда 500 га-дин майданрай техил кIватI хъувуна кIанзава. “Кутульский” майишатди 100 гектардин майданда зулун мух цанвай. Алай вахтунда ина кIвалах къизгъиндаказ физва.
“Алай вахтунда, квез аквазвайвал, гад агудунин кIвалах башламишнава, техника чкадал ала, чна 200 гектардай мух кIватI хъийида. Гьар са гектардай 20 центнер хьун гуьзлемишзава”, — лугьузва СПК-дин директор Шагьмурад Рамалданова.
Алван Рамазанова
