19-апрелдиз Дагъустан Республикадин Кьил Сергей Меликов къадим шегьердиз фена ва “Дербент шегьер” округдин мулк комплекснидаказ вилик тухун”  РД-дин госпрограмма уьмуьрдиз кечирмишзавай гьалдиз талукьарнавай совещание кьиле тухвана.

Мярекат ачухуналди, Сергей Меликова шегьер туриствилин сезондиз вини дережада аваз гьазур хьунай Дербентдин мэрдиз, администрациядин къуллугъчийриз ва жавабдар маса ксариз сагърай лагьана.

Совещанидин кьилин месэла веревирд ийидайла, региондин Кьили  “Дербент шегьер” округдин мулк комплекснидаказ вилик тухуниз талукь РД-дин госпрограмма уьмуьрдиз кечирмишунин гьалдиз хъсан къимет гана.

Региондин регьберди къейдна хьи, четинвилер гьалтзаватIани, шегьерда кIва­лахар пландин бинедаллаз кьиле тухузва. Крар кьиле физвай гьалдини алай вахтунин ва агьалийрин истемишунриз жаваб гузва. Карчийриз, бизнесменриз кар вилик тухунизни манийвалзавач. КIвалах­рал жегьилар желбзава.

— Дербент шегьер вилик тухуниз талукь месэлаяр Россиядин Федерациядин Президент Владимир Путинахъ галаз гуьруьшмиш хьайилани къарагъарайди я, — лагьана Сергей Меликова. — Ада уьлкведин къадим шегьер вилик тухуниз талукьарнавай вири крарин тереф хуьзва. Президентди гьакI Дербент шегьердиз меценат Сулейман Керимова гузвай куьмекдилайни разивал авуна.

Региондин Кьили къейд авурвал, Дербент шегьердин мулк комплекснидаказ ви­лик тухуни жемиятдин майданар аваданламишун, кIвалер, гьаятар ремонтун, яшайишдин объектар ва инженерный къурулушар цIийикIа туькIуьр хъувун, яша­йишдин кIвалер эцигун ва гзаф маса крар фикирдик кутазва.

Мярекатдал малумарайвал, къенин йикъалди хейлин крар уьмуьрдиз кечирмишнава. 140 чка авай аялрин бахча эцигнава. 4 школадин ва аялрин 9 бахчадин дараматар капитальнидаказ ремонтнава ва абур герек тадаракралди таъминарнава. Школайрин патарив къугъунардай 10 майдан туькIуьрнава, 4 куьче ремонтнава, 2347,5 кв. м. майдан авай муниципалитетдин яшайишдин фонд арадал гъанва. Гъилевай йисуз 51 куьче капитальнидаказ ремонтда ва аваданламишда. 5 парк цIийикIа туькIуьр хъийида. Марфадин ва чиркин ятарин канализациядин линияр патал цIийи тадаракар маса къачуда.

Идахъ галаз сад хьиз кIвалерин гьаятар аваданламишуниз, куьчеяр, цин, чимивилин линияр, электросетар ремонт авуниз, капитальный эцигунар вилик тухуниз талукь кIвалахарни гъиле кьада.

“КIватI хьанвайбурун фикир са кардал желбзава, бюджетдин гьар са манат тайин­ чкадиз харж авуна кIанда. Идахъ галаз ала­­къалу яз, къайдаяр хуьдай органривай­ тIалабзава: гьукуматди чара ийизвай пулар харжзавай крарал дикъетдивди гуьзчивал ая”, — лагьана Сергей Меликова.

РД-дин Гьукуматдин Председателдин Сад лагьай заместитель Руслан Алиева хабар гайивал, РФ-дин “Кеферпатан Кавказдин федеральный округ вилик тухун” госпрограммадин мярекатрин сергьятра аваз федеральный бюджетдин такьатрихъ Дербентда чиркин ятар михьдай имарат, “Къайтагъ — Дербент” водовод, РФ-дин “Образование вилик тухун” госпрограммадин сергьятра аваз сада — 804 ва муь­куьда 1224 чка авай умуми образованидин кьве школа эцигда. Алиева мадни лагьайвал, 2025-йисалди Дербент ше­гьер­да гзаф кIвалахар кьилиз акъудда ва  и рекьериз 183 миллиард манат пул ­харжда.

Дербент шегьердин администрациядин кьил Рустамбег Пирмегьамедова ше­гьер комплекснидаказ вилик тухуниз талукьарнавай пландик квай гьакъикъи крарикай ихтилатна. Адан гафаралди, умуми кьадардин пуларин 74 процент хсуси инвестицийрин гьисабдай я. Абурун куьмекдалди яшайишдин кIвалер, администрациядин, коммерциядин ва тIуьнар недай дараматар эцигда.

ИкI, алатай йисуз шегьерда чIехи мугьманхана ишлемишиз вахкана. ЦIи мадни пуд эцигзава. ГьакIни 6 мертебадин мугьманханадин комплекс, Шеболдаеван куьчеда  апарт-отелрин 4 комплекс хкажзава. 70 агъзур квадратный метрдин майдан авай 7 кIвал ишлемишиз вахканва.

РД-дин эцигунрин, архитектурадин ва ЖКХ-дин министр Артур Сулейманова ма­лумарайвал, Дербентда эцигзавай чиркин ятар михьдай имаратрал  83 процентдин кIвалахар тамамарнава. РФ-дин гьукуматдин тапшуругъдалди вири кIвала­хар цIи куьтягьун патал резервдин фондунай мадни субсидияр чара авунва.

“Къайтагъ — Дербент” водовод патал 2 миллиард манатдилай виниз пул чара авунва. “Шурдере — Дербент” водовод туь­кIуьрун патални проектар гьазурзава.

Республикадин Кьили гьукумдин жавабдар органриз герек тапшуругъар гана.

«Лезги газет»