Лезги халкьдин акьалтзавай несилдин векилри — чи жегьилри и ва я маса конкурсра, акъажунра вилик жергейра чкаяр кьурла, агалкьунар хьайила, чун гзаф шад жеда, рикIерик дамахдин гьисс акатда. И кардин себеб ам я хьи, бажарагълу, акьуллу жегьилар акурла, чна чи миллетдихъ, халкьдихъ неинки тарих хьайиди, гьакIни экуь гележег авайди аннамишзава. Иллаки еке шадвал акатда чак и агалкьунар муракаб, четин, дерин акьул лазим тир рекьерай хьайила. Шукур Аллагьдиз, ихьтин хабарарни чав вахт-вахтунда агакьзава.
Апрелдин юкьвара Ярославлдин областда, “Образование” милли проектдин сергьятра аваз, “Жегьил пешекарар (WorldSkills Russia)” милли 10 лагьай чемпионатдин нетижаяр кьадай акъажунар кьиле фена.
Абур ругуд рекьяй тешкилнавай: “Зегьмет хуьн”, “Химиядин технологийрин аппаратчик”, “Лабораторийрин химиядин анализ”, “Флористика”, “Финансар”, “Тамар атIудайбур”. Санлай къачурла, гъалибвал патал конкурсда уьлкведин жуьреба-жуьре регионрай тир 170 иштиракчиди акъажунарна. “Зегьмет хуьдайбур” рекьяй иштиракзавайбур галачиз, амай рекьерай са шумуд паюникай (дережадикай) ибарат тир чемпионатдин нетижаяр кьуна.
ИкI, “Финансар” рекьяй 2 лагьай чкадиз лезги жегьил Суфьян Замирович Жигеров лайихлу хьана. 2021-йисан декабрдиз Суфьяна вич алай вахтунда яшамиш жезвай Москва шегьердин ва областдин жегьил пешекаррин X чемпионатдин финалда 1-чка кьунай ва Россиядин чемпионатда иштиракун патал Ярославль шегьердиз рекье тунай. Инани ада вичин алакьунар гимишдин медаль къачуналди раижна.
Суфьян Жигеров 2003-йисан 25-августдиз Махачкъалада дидедиз хьана. Адан диде-бубадин ери-бине Ахцегьрин хуьряй я. Махачкъалада авай республикадин многопрофильный лицейда 9-класс акьалтIарайдалай кьулухъ жегьил РФ-дин гьукуматдин патав гвай финансрин университетдин Москвадин финансрин колледждик экечIна ва ина агалкьунралди чирвилер къачузва. Суфьяна неинки финансрин рекьяй вичин тафаватлувал къалурзава. Гададин чIехи буба Абад Жигерова дамахдивди къейдзавайвал, ада гьеле лицейда амаз математикадай, урус чIалай ва маса тарсарай олимпиадайра агалкьунралди иштиракзавай, вилик чкаяр кьазвай.
Къастунал кIеви жегьилдихъ чирвилерин муракаб рехъ мадни давамардай ният ава. Къуй Суфьянахъ ва чирвилерин рекье виликди физвай вири жегьилрихъ мурадрив агакьардай агалкьунар хьурай.
Жасмина Саидова
