КIеве гьатай гьар са касдин дердиникай хабар кьадай, вичин ва вич кьиле авай карханадин (“ОАО Дагюгстрой”) коллективдин патай куьмек гудай Гьажи Ражабович Жабраилован мергьяматлувиликай “Лезги газетда” инлай виликни кхьейди я.
Милициядин майор Абдулмалик Мегьамедова 2008-йисуз террористрин бандадихъ галаз тухвай барабарсуз женгиникай ва гьа женгина залан хер хьайи ам телеф хьайиди виридаз хабар я. 2009-йисан ноябрдин вацра Игитдин сурал адан уьмуьрдин юлдаш, руш ва вах, 2010-йисан июлдиз адан хвани жаллатIри яна кьейила, вири дагъустанвийрин рикIер къарсурнай.
Гьа икI, Россиядин Игит А.Мегьамедован мукьва-кьилийрикай адан езне ва гъвечIи яшара авай кьве хтул амукьна. Абурузни къурхуяр гуз хьана. Эхирни езне кьве аялни галаз (тIвар кьазвач) 2011-йисуз Дербентдиз куьч хьуниз мажбур хьана. Ина са шумуд йисуз кIвалахнатIани, адавай вичиз яшамиш жедай кIвал къачудай такьатар (пул) къазанмишиз хьанач.
КIеве гьатнавайдан дердиникайни лезги халкьдин мергьяматлу хва Гьажи Жабраиловаз хабар хьана. Мукьвара ада Игитдин езнедиз ва кьве аялдиз вири къулайвилер авай кIвал багъишна.
Къейдна кIанда хьи, Гьажи Ражабовича Ватандин ЧIехи дяведин иштиракчийриз, буба-диде амачир етимриз ва лап кIеве гьатнавай ксариз вичинни коллективдин патай багъишнавай (ганвай) им 10 лагьай кIвал я.
Аферин! Баркалла ихьтин рухвайриз!
Нариман Къарибов
