И йикъара ММА-дин спортсмен, Каспийскда яшамиш жезвай лезги хва Мугьаммед  Эминова чи халкьдин гьар са векилдик еке шадвал кутуна. Какахьай единоборствойрай (ММА) бягьсер кьиле тухунал машгъул тир Россиядин виридалайни чIехи промоушенди (Fight Night Giobal) Екатеринбургда тешкилай чемпионатда кьезил заланвал авай (66 кг-дал къведалди) спортсменрин арада Александр Грозинахъ галаз бягьсина  чемпионвилин тIвар къазанмишна.  Мубаракрай!

Мугьаммед Эминован 23 йис я. Икьван гагьда тухвай бягьсера ада 12 сеферда гъалибвал къазанмишна, са сеферда бягьс садан хийирдизни хьанач, анжах са сеферда ам кумукьна.

Чи ватандашдихъ галаз бягьсиниз экъечIай Александр Грозин (23 йис) Свердловский областдай тир. Икьван гагьда кьиле тухвай бягьсера ам 13 сеферда гъалиб хьана, пуд сеферда кумукьна, са сефердани бягьс садан хийирдизни хьанач.

Къейд. Мугьаммед Эминова чемпионвилин тIвар къазанмишай бягьс, Псковдин десантрикрин экуь къаматар рикIел хуьнин лишан яз, спортдинни ватанпересвилин “Шагнувшие в бессмертие” фестивалдин сергьятра аваз тешкилнавай.

Регина  Семедова