10 ва 11-сентябрдиз Москвадин женгинин искусствойрин центрада самбодай спортдин и жуьредин бине эцигайбуруз талукьарна Кубок кьиле фена. Дуьньядин 13 уьлкведай тир 250-далай виниз спортсменрин арада кьиле фейи акъажунра чи ватанэгьли самбодай (гьакI спортдин са шумуд жуьредай мадни) хейлин шабагьрин сагьиб Аслан Къурбановани иштиракна, 88 кг-дал къведалди заланвал авайбурун арада ам гимишдин медалдиз лайихлу хьана. Мубаракрай!
РикIел хкин: виликдай и акъажунар “Харлампиеван мемориал” тIвар алаз кьиле тухузвай. Дуьньядин, уьлкведин, республикадин спортдин кесерлу майданра хьиз, анани Аслана са шумуд сеферда иштиракнай, бедендин ва руьгьдин викIегьвал, лигимвал, къастунал кIевивал къалуруналди, кIвенкIвечи чкаярни кьунай.
Рагнеда Рамалданова
