ДаркIуш-Къазмайрилай тир дяведин гьерекатрин ветеран Руслан Улуханова вичиз Ватандиз къуллугъ авун давамардай къаст авайдакай малумарна. ИкI, ада Россиядин Яракьлу Къуватрин жергейра къуллугъ авунин гьакъиндай икьрар кутIунна ва дяведин махсус серенжемда иштиракда.
Къейд ийин, Руслана 2017-2022-йисара Россиядин контингентдин составдик кваз Сириядин мулкара икьрардин бинедаллаз къуллугъ кьилиз акъудна. 2022-йисузни ам СВО кьиле физвай мулкара вилик жергейра хьана. Гуьгъуьнлай, хизандин месэлайрихъ галаз алакъалу яз, ам къуллугъдилай элячIуниз мажбур хьанай.
Руслан Улуханован 38 йис я. Мад икьрардал къул чIугуналди, ада Ватан хуьн вичин буржи яз гьисабзава. СтIал Сулейманан райондин кьилин заместитель А.Фатулаевахъ галаз гуьруьшмиш хьайи вахтунда ватанперес аскерди вич государстводин итижар хуьнин къуллугъ давамариз гьазур тирдакай лагьана.
А.Фатулаева аскердиз СВО-дин иштиракчийриз гузвай куьмекрикай, абуруз талукь кьезилвилерикай ихтилатна. Р.Улуханован ватанпересвал гьисаба кьуналди, адаз райондин бюджетдай 100 агъзур манат пул гана. Идалайни гъейри, 100 агъзур манат пул адав мергьяматлувилин «Умуд» фондунин патайни агакьна.
Райондин администрациядин пресс-къуллугъди хабар гайивал, Р.Улуханов 2024-йисуз районэгьлийрикай икьрар кутIуннавай 15 лагьай аскер я. Ихьтин ватанпересвилини жуьрэтлувили чи ватанэгьлияр уьлкведин хатасузвал хуьник пай кутаз гьазур тирдан гьакъиндай шагьидвалзава.
Салим Салимов
