Украинада кьиле физвай махсус операцияда телеф хьайибурун хизанриз куьмек гун патал Дагъустанди “Вири санал” лишандик кваз арадал гъанвай фондуниз алава такьатар чара ийидайвал я. Идакай РД-дин Кьил Сергей Меликова мукьвара Санкт-Петербургда кьиле фейи экономикадин международный форумда, ТАСС-диз интервью гудайла, лагьана.
“Дагъустанди виликдай “Вири санал” фондуниз 50 миллион манат пул ахъайнавай. Исятда чун, чи ватанэгьлийри чпиз лайихлу куьмек гузвайди гьиссдайвал, мад сеферда тахминан гьа виликан кьадарда аваз пулдин такьатар чара ийиз гьазур я”, — лагьана Сергей Меликова.
Украинада кьиле физвай махсус операцияда телеф хьайи дагъустанвийрин хизанриз куьмекар гун патал республикадани кьилдин фонд тешкилнава. Аниз пулдин такьатар меценатри, карчийри, жергедин агьалийри гузва. Алай вахтунда 220 миллион манат пул кIватI хьанва.
Такьатар паюнин кIвалах зегьметдин ва яшайишдин рекьяй вилик финин министерстводин, образованидин ва илимдин, здравоохраненидин министерствойрин, МЧС-дин ва муниципалитетрин кьилерин гуьзчивилик ква.
«Лезги газет»
