2023-йисан 11-июндиз 72 йисан яшда аваз Моллакентдин юкьван школадин вири муаллимрин, аялрин ва диде-бубайрин рикI алай зегьметдин ветеран, Дагъустандин лайихлу муаллим Султанов Мирзебала Муслимович рагьметдиз фена.
М.М.Султанов 1951-йисан 10-октябрдиз Кьурагь райондин Бурши-Макьа дидедиз хьана. 1952-йисуз хизан Мегьарамдхуьруьн райондин Советский хуьруьз куьч хьана. 1958-1969- йисара гьа ина хуьруьн юкьван мектебда кIелна. 1970-1972-йисара армиядин жергейра къуллугъна.
1972-йисуз Дагъустандин госпединститутдин естественно-географический факультетдик (биологиядин ва химиядин отделение) экечIна. Вад йисуз чирвилер къачурдалай кьулухъ, 1977-йисалай 2020-йисалди, саки 43 йисан къене, Моллакентдин юкьван школада муаллимдин, тешкилатчидин, завучдин везифаяр тамамарна.
Зарафатар кIандай, пIузаррал датIана хъвер алай М.М.Султанова неинки вичин яргъал йисарин намуслу зегьметдалди, гьакIни инсанвилин хуш рафтарвилелди юлдашрин арада гьуьрмет къазанмишна. Ам масадан дерди-гьалдикай хабар кьадай, рикI ачух, къилихдиз къени инсан тир.
Моллакентдин юкьван школадин коллективди муаллимар тир уьмуьрдин юлдаш Рима Исабеговнадиз, гададин свас Рамида Жарудиновнадиз, рухвайриз — Назимазни Акимаз, хтулриз ва вири мукьва-кьилийриз Мирзебала Муслимович кечмиш хьунихъ галаз алакъалу яз, дериндай хажалат чIугунивди, башсагълугъвал гузва.
