22-декабрдиз Дагъустандин Государстводин секретарь Хизри Абакаровни Дербент шегьердин мэр Рустамбег Пирмегьамедов азаддиз кьуршахар кьунай дуьньядин Кубокдин сагьиб Даурен Куругълиевахъ галаз гуьруьш хьана.

РикIел хкин, 12-18-декабрдиз Белград шегьерда (Сербия) азаддиз кьуршахар кьунай дуьньядин Кубок патал акъажунар кьиле фена. Урусатдин хкянавай командадик кваз ана иштиракай Дагъустандин спортсменри къизилдин 9 медаль къазанмишна. Абурун арада бине Хив райондин Цналрин хуьряй тир Даурен Куругълиевни авай.

Гуьруьшдал гъалибчиди акъажунар кьиле фейи къайдадикай ва спортдин рекье инлай кьулухъ кьилиз акъудиз кIанзавай къастарикай, фикиррикай лагьана. Д.Куругълиеван гафаралди, вилик азаддиз кьуршахар кьунай Олимпиядин къугъунра иштиракдай спорстменар тайинардай турнир ква. Алай вахтунда ам гьаниз гьазур жезва. Спорстмендин мурад Олимпиядин къугъунра къизил къачун я.

Хизри Абакарова Даурен Куругълиеваз гъалибвал мубарак авунихъ галаз санал, адаз кIвалер маса къачудай пулни гана. “Зун Дербентдин мэр тир чIавуз Даурен Куругълиевахъ галаз гуьруьшмиш хьанай. А вахтунда за, эгер Даурена дуьньядин чемпионатда къизилдин медаль къазанмишайтIа, адаз савкьат яз кIвалер гуда лагьана хиве кьунай. За гьамиша жува гайи гаф хуьзва”, — къейдна Хизри Абакарова пулдин такьатар вахкудайла.

«Лезги газет»