МВД-дин хроникадай

Дагъустандин МВД-ди региондин УФСБ-дин къуллугъчийрихъ галаз санал тухвай ахтармишунрин нетижада са фермерди лутувал авунихъ ва къалп документар ишлемишунихъ галаз алакъалу тахсиркарвал дуьздал акъуднава. Идакай РД-дин МВД-дин пресс-къуллугъди хабар гана. 

Тахсиркарвал авунвайда, тапан документар ишлемишуналди, госшабагь къачуна. Дагъустандин УФСБ-дин материалрал асаслу яз, Ногъай райондин ОМВД-дин силисдин отделди лежбервилинни фермервилин майишатдин регьбердиз талукь яз РФ-дин УК-дин 159-статьядин 4-паюнай (лутувал) ва РФ-дин УК-дин 327-статьядин 2-паюнай (къалп документар, государстводин шабагьар, муьгьуьрар ва я бланкар туькIуьрун ва ишлемишун) уголовный дело къарагъарнава.

Силисчийри малумарнавайвал, шак физвай дишегьлиди грант къачунин конкурсда вич гъалиб жедайвал, талукь тир министерстводиз, чиз-чиз, къалп малуматар къалурна.

ИкI, ада кардик цIийиз кьил кутазвай фермерриз талукь 3 миллион манат къанунсуздаказ вичиз къачуна. Пул агакьайдалай кьулухъ шак фенвайда, а такьатар КФХ-дин игьтияжриз харжна лагьана, тапан чарар-цIарар къалуруналди, «гьахъ-гьисаб» авуна.

И делилдай ахтармишунар давам жезва.

«Лезги газет»