9-октябрдиз футболдин «Динамо» клубдин тренерар, Россиядин футболдин машгьур устадар тир Къурбан Бердыев, Иван Данилянц, Аким Арзуманов ва абурухъ галай маса юлдашар Ахцегьрин баркаван чилел райондин регьбер Абдул-Керим Палчаев кьиле аваз райондин активди, кьелни фу гвай аялри, спортдин векилрин дестеди хушдиз къаршиламишна.
Советрин Союздин Игит лётчик Валентин Эмирован памятникдал цуьквер эцигна, районда спортдин базадихъ, Ахцегьрин музейдихъ ва тамашуниз лайихлу маса чкайрихъ галаз таниш хьайидалай кьулухъ багьа мугьманар футболдин «Ахцагь» тIвар алай клубдин стадиондал районда футболдин школадин тренеррихъни аялрихъ галаз гуьруьшмиш хьана. Мугьманар тебрик авунин гаф рахуналди, мярекат Абдул-Керим Палчаева ачухна.
– Гьуьрметлу юлдашар, къе къадим Ахцегьиз футболдай дуьньядин дережадин лайихлу тренерар атанвай лишанлу йикъарикай сад я. Месела, Къурбан Бекиевича вичин вахтунда «Рубин», «Ростов» командайрин тренер яз «Барселона», «Бавария», «Интер», «Челси», «Атлетико», «Тотанхем», «Андерлехт», «Аякс» хьтин дуьньяда машгьур командайрин винел гъалибвал къачуна. Квез Ахцегь район спортдин гьар жуьре хилерай Олимпиададин, дуьньядин, Европадин ва чи уьлкведин дережайрин чемпионар хьайи зурба пагьливанралди машгьур тирди чида, – элкъвена ам мугьманрихъ. – Чаз футболдайни къалуриз жедай хьтин агалкьунар ава: «Ахцагь» команда са шумудра Дагъустандин чемпион хьана. Умудлу я, куь куьмекдалди гила чавай, Иншаллагь, футбол йигиндиз вилик тухуз жеда. И кар патал чаз вири шартIар, мумкинвилер ава. Республикада хьиз, чнани аялринни жегьилрин футбол артмишуниз иллаки кьетIен фикир гузва. Гъилевай йисуз ина, Дагъустанда сифте яз, аялринни жегьилрин «Ахцагь» тIвар алай футболдин школа (ДЮСШ, директор — Камиль Гьажиев) ачухнава. Районда футболдин искусственный векь авай пешекарвилин майдан, гьакI лап вижевайдаказ тадаракламишнавай мини-футболдин муьжуьд майдан кардик ква. Къведай йисуз мад гъвечIи пуд майдан эцигун, «Ахцагь» чIехи стадион, республикадин дережадин акъажунар кьиле тухуз жедайвал, къулайдиз тадаракламишун фикирдик ква. Республикадин гзаф районрилай тафаватлу яз, чаз аялринни жегьилрин футбол вилик тухудай мягькем база ава. Куь патай тешкиллувилин, чкадин тренерринни муаллимрин пешекарвилин дережа, устадвал хкажунин карда куьмек герек жеда, — къейдна ада.
Вичин, спортдин терефдаррин ва вири районэгьлийрин патай Абдул-Керим Палчаева мугьманриз, Ахцегьа жегьил спортсменрихъ галаз гуьруьш жедай вахт жагъурунай рикIин сидкьидай чухсагъул малумаруналди, абуруз рикIел аламукьдай савкьатар яз гъили хранвай лезги гуьзел халичаяр пишкешна.
Гуьгъуьнлайни мярекатдин тамадавал ийизвай Ахцегь РУО-дин начальникдин заместитель Сулейман Сулейманова гаф мугьманриз гана.
Къурбан Бердыев, Махачкъаладин «Динамо» командадин кьилин тренер, футболдай СССР-дин спортдин мастер: – Чун багърибур хьиз кьабулунай чухсагъул! Дагъустандиз теклифайла, РД-дин Кьил Сергей Меликова чи вилик эцигай сифте месэла чкайрал аялринни жегьилрин футбол тешкилун тир. Алай вахтунда Сергей Алимовичан тапшуругъдалди чна, Дагъустандин районра къекъвез, аялрин футбол чкадилай юзурун патал авай гьаларни мумкинвилер ахтармишзава. Разивилелди къейд ийин, ина дирибаш, къастунал кIеви, хъсандиз кIвалахайтIа, чпихъ гележег авай аялар ва спортдин мягькем база ава. Кьилинди, абурухъ галаз кIвалахдай тренеррин устадвал хкажна кIанда. И кардал чахъ галаз атанвай зурба пешекар тир зи дуст Иван Альбертович машгъул жеда.
Иван Данилянц, машгьур футболист, тренер, спортдин тешкилатчи: – Аквар гьаларай, чи вилик Дагъустанда санлай аялринни жегьилрин футбол вилик тухунин кьилди проект туькIуьрна кIвалахунин везифа ква. Вични эгечIна кIанда гьеле лап гъвечIи аялрилай. Татарстанда 6 йисуз кIвалахна, гьахьтин тежриба чаз хьанва. Ана са шумуд агъзур аялдикай чна алакьунар авай 100 аял хкяна, абурукай вири уьлкведиз машгьур «Рубин» команда тешкилна. Гьа тежриба чна, Аллагьди гайитIа, Дагъустандани тикрарда, са гадайрихъ галаз ваъ, ашкъи-гьевес авай рушарин командани туькIуьрда…
Мярекатдал гьакI Махачкъаладин «Динамо» командадин исполнительный директор Аким Арзуманов, футболдин «Ахцагь» школадин тренерар тир спортдин ветеран Нурудин Багъиров, Магьмуд Асланов ва масабурни рахана. Мярекат мугьманар «Ахцагь» ДЮСШ-дин тренеррихъни жегьил футболистрихъ галаз суал-жавабдин тегьердин суьгьбетар авуналди давам хьана.
Дашдемир Шерифалиев
