13-февралдиз Кьурагьрин ДЮСШ-да райондин администрациядин физический культурадин (ФК) ва жегьилрин крарин (ДМ) рекьяй отделди ДЮСШ-дихъ галаз санал райондин школайра кIелзавай аялрин арада кIенкIвечивал къазанмишун патал гьар йисуз азаддаказ кьуршахар кьунай акъажунар тешкилун адетдиз элкъвенва. ЦIи лагьайтIа, абур Ватан хуьдайбурун йикъалай гъейри, ДАССР-дин 100 йис тамам хьунин лишанлу вакъиадизни талукьарнавай.

Акъажунра Кьурагь, КьепIир, КIири, Ашар, Усугъ, Хпеж ва Гелхен хуьрерин мектебра чирвилер къачузвай 90  аялди иштиракна. Абуру заланвилин 12 категориядай чпин устадвал къалурна. Жаван пагьливанрин бягьсериз тамашиз, абурун мукьва-кьилияр ва спортдин и жуьредал рикI алай гзаф ксарни атанвай.

ИкI, акъажунра агъадихъ галай спортсменар 1-чкайриз лайихлу хьана: Рамин Гьасанбегов (22 кг, КIири), Жабраил Бабаев (24 кг, КьепIир), Абдурагьим Мамедов (26 кг, Кьурагь), Рашид Бабаев (28 кг, Кьурагь), Нариман Эмирбегов (35 кг, Кьурагь), Гьабиб Идрисов (38 кг, КьепIир), Адам Исаев (42 кг, Кьурагь), Багьаудин Ражабов (45 кг, Кьурагь), Анвар Гьажибегов 50 кг, КьепIир), Шохрат Шамхалаев (57 кг, КIири). Санлай къачурла, Кьурагьрин командади 1-чка кьуна.

Гъалиб хьайи спортсменриз ва призерриз медалар, грамотаяр ва пулдин пишкешар, турнирда виридалайни тафаватлу хьайи са шумудаз махсус пишкешар гана.

Чи мухбир