Меркезда кьиле фейи РД-дин культурадин министерстводин коллегиядин заседанида Дагъустандин милли политикадин ва диндин крарин рекьяй, туризмдин ва халкьдин сеняткарвилин, жегьилрин крарин рекьяй министрар Энрик Муслимова, Расул Ибрагьимова, Камил Саидова, РД-дин общественный палатадин председатель Абдугьалим Мачаева, информациядин, алакъадин ва массовый коммуникацийрин министр­дин сад лагьай заместитель Мегьа­медбег Агьмедова, Махачкъала шегьердин администрациядин кьилин заместитель Вадим Асланова, РД-дин спортдин министрдин заместитель Гьайдарбег Гьайдарбегова, республикадин культурадин идарайрин хейлин къуллугъчийри ва масабуру иштиракна.

Мярекат культурадин министр Зарема Бутаевади ачухна. Ада заседанидал гьялдай, веревирд ийидай  месэлайрин важиблувиликай лагьана ва коллегиядин къурулушдик цIийи инсанар кутунвайдакайни малумарна.

РД-дин культурадин министрдин заместитель Мурад Гьажиева Театрдин йисан сергьятра аваз республикада кьиле тухузвай серенжемрикай, мярекатрикай ихтилатна.

— Къе республикада государстводин 12 театрди Дагъларин уьлкведин халкьариз къуллугъзава, — ла­гьана ада. — Министерстводи театррин регьберрихъ галаз  цIи тешкилдай яратмишунрин кIвалахрин план туькIуьрнава. ЦIи чна фадлай гуьзлемишзавай карни кьилиз акъат­на. Избербашда авай даргийрин  госдрамтеатрдин дарамат ишлемишиз вахкана. Чна СтIал Сулейманан 150 йисан, Пушкинан 220 йисан юбилеяр, Виридуьньядин театррин, Виридуьньядин нинийрин театррин йикъар кьиле тухвана, “Библиотекайрин йиф”, “Музейрин йиф” акцийра иштиракна.

М.Гьажиева къейд авурвал, Театрдин йисан сергьятра аваз республикада гзаф кьадарда тамашачияр желб авур международный те­атррин фестивалар кьиле фена. Абу­рук акатзава: Каспий гьуьлуьн къерехра авай уьлквейрин театррин милли фестиваль, БРИКС-дик акатзавай уьлквейрин нинийрин театррин фестиваль, Каспий гьуьлуьн къерехрив гвай уьлквейрин халкьдин театррин фестиваль.

Мярекатдал мадни са хъсан кардикай лагьана: министерстводи республикадин “Дагъустан” телеканалдихъ галаз санал милли теа­трри къалурзавай тамашайрин видеозапись ийида ва ахпа телевиденидай къалурда. Лезгийрин ва ногъайрин госдрамтеатррин материально-технический база мягькемарун фикирдиз къачунва. ГьакIни Лезгийрин госмуздрамтеатрда кон­цертрин виртуальный зал ачухун патал федеральный бюджетдай 5 миллионни 600 агъзур манат пул ахъайнава. Республикадин опе­радин ва балетдин  театрдиз, урус­рин, лакрин ва нинийрин театр­риз автотранспорт къачун, аваррин ва урусрин театррин дараматар ремонт авун патал пулар чара ийи­да.

Коллегиядин заседанидал  культурадинни спортдин хейлин устадрив гьукуматдин наградаяр вахкана.

Хийир Эмиров