Ахцегь район
РФ-дин Госдумадин депутат Артем Бичаеван ва Ахцегь райондин кьил Абдул-Керим Палчаеван куьмекдалди Фиярин хуьре аялар къугъвадай 300 кв. метрдикай ибарат махсус майдан туькIуьрзава.
Алай вахтунда майдандал перпилагар, турникар, тренажерар, куьсрияр кардик кутунва. Аялар къугъвадай майдан элкъвена жугъундалди кIевда ва чилени резиндикай гьазурнавай махсус затI экIяда.
ГьакIни Фиярин хуьре чкадин агьалийри ял ядай парк арадал гъунин кIвалахрив эгечIнава ва Ватандин ЧIехи дяведа телеф хьайи фиявийриз эцигнавай гуьмбет цIийикIа туькIуьр хъийизва.
Ахцегь райондин администрациядин пресс-къуллугъди хабар гузвайвал, муниципалитетдин кьил А.-К.Палчаева райондин центрадивай яргъа, дагълух чкада авай хуьрер авадан авуниз кьетIен фикир гузва ва ватанэгьлийриз чпин бубайрин хуьрериз хтуниз, анра кIвалер эцигуниз, яшамиш хьуниз эвер гузва. Райондин кьилиз идалай кьулухъ Фиярин хуьре футбол, волейбол, баскетбол къугъвадай махсус майданни туькIуьриз кIанзава.
Докъузпара район
И йикъара Докъузпара райондин кьил Мегьамед Шамилова чкадин са жерге агьалияр кьабулна ва абуру къарагъарай месэлаяр веревирдна.
Муниципалитетдин кьилин патав 11 кас атанвай. Абуру М.Шамиловаз хабар гайи месэлаяр асул гьисабдай рекьер туькIуьрунихъ, кIвалахдал акъвазунихъ, чилерихъ галаз алакъалубур тир.
Абурукай бязи месэлаяр райондин кьили чкадал гьялна, амайбурни вичин гуьзчивилик кутуна, мукьвара гьялун хиве кьуна.
РикIел хкин, мукьвара Махачкъалада РД-дин Гьукуматдин членрихъ, муниципалитетрин кьилерихъ галаз кьиле фейи совещанидал Сергей Меликова бязи шегьерра, районра чкадин агьалийрин арзайриз кутугай гьалда фикир тагузвайди къейдна ва муниципалитетрин кьилериз и месэла эвелимжи чкадал эцигун буйругъна. Докъузпара райондин кьил М.Шамиловани гьисабзавайвал, гьукумдинни жергедин агьалийрин арада ачух алакъаяр хьун герек я. Ихьтин гьалара саналди хъсан нетижаяр къазанмишиз алакьда.
Мегьарамдхуьруьн район
8-июлдиз Мегьарамдхуьруьн райондин кьил Фарид Агьмедова администрациядин жавабдар къуллугъчийрихъ галаз совещание кьиле тухвана ва анал муниципалитетдин мулкара санитариядин рекьяй хуьзвай михьивилиз, зирзибил вахт-вахтунда гадаруниз, милли проектар кьилиз акъудзавай гьалариз талукь месэлаяр веревирдна.
Совещанидал хабар гайивал, алай вахтунда Гилийрин хуьруьн куьчейра къир цана акьалтIарзава. Гуьгъуьнлай Бут-Къазмайрин ва Хъартас-Къазмайрин хуьрерин куьчейрани, проектдин сергьятра аваз, къир цада. Филерин ва КьепIир-Къазмайрин хуьрера паркар туькIуьрунин кIвалахар давам жезва. Фарид Агьмедова пудратчи карханайрин векилрин рикIел кIвалахар планда къалурнавай вахтунда акьалтIарун герек тирди хкана.
Хуьрера зирзибил кIватIунин ва гадарунин патахъай Ф.Агьмедова жавабдар идарайрин векилриз са жерге буйругъар гана. «Эгер хуьрерин кьилери зирзибилдихъ галаз алакъалу месэлайриз фикир гузвачтIа, зирзибил тухвана, гьахьтин хуьруьн администрациядин кьилин кIвалин вилик ичIира. Къуй чир хьурай, ихьтин чими вахтунда вахт-вахтунда зирзибил гадар тавун вуч кар ятIа», — лагьана райондин кьили.
СтIал Сулейманан район
И йикъара СтIал Сулейманан райондин кьил Саид Темирханов Герейханован хуьруьн 2-нумрадин мектебдин цIийи дарамат авай гьалдихъ галаз таниш хьана.
Эцигунринни монтаждин кIвалахар объектдал тамамдиз акьалтIарнава. Амма, энгел тавуна, арадай акъудна кIанзавай са жерге кимивилер ама. Кьилди къачуртIа, цIаяр кьур дуьшуьшра ишлемишун патал яд кIватIзавай резервуарар ва насосрин къурулуш цIийикIа туькIуьр хъувун, марфар къвайила яд авахьдай махсус чкаяр кардик кутун, мебель кIватIна акьалтIарун ва са жерге маса кIвалахар вилик кума.
Идалайни гъейри, мектебдин кухня патал мебель ва спортзалдиз герек алатар маса къачуна кIанзава. Роспотребнадзорди мектебдиз заключение гьеле ганвач, медицинадин кабинетдихъни махсус лицензия авач. Вири и месэлаяр вахтунда кьилиз акъудун патал жавабдар ксар тайинарнавай махсус план туькIуьрнава. Саид Темирханова кIелунин цIийи йис алукьдалди мектеб вири рекьерай гьазур хьун герек тирди къейдна ва планда къалурнавай кIвалахар вахтунда акьалтIарунал гуьзчивал тухун муниципалитетдин кьилин заместитель Эльдар Рустамовал тапшурмишна.
Кьурагь район
Кьурагь райондин Къумухърин хуьре чкадин администрациядин кьил Расул Агъаметован теклифдалди жемятдин къуватралди аялар къугъвадай, спортдал машгъул жедай махсус майдан арадал гъанва. Инаг спортдин алатралди таъминарнава, куьсрияр эцигнава, элкъвена жугъундивди кIевнава.
«Хуьруьн центрада администрациядин дарамат, аялрин бахча, почта, медениятдин кIвал ава, амма ял ядай чка авачир. Гила хуьруьнвийриз ял ядай чкани хьанва, аялар къугъвадай майданни», — лугьузва Р. Агъаметова.
Агьмед Магьмудов
