Дуьньядин халкьарин хайи чIаларин юкъуз СтIал Сулейманан районда 13 лагьай сеферда яз районрин уртах илимдинни тежрибадин конференция кьиле фена. Лезги чIал чирунин важиблу месэлайриз бахшнавай мярекат цIи, Ватан хуьзвайбурун йисахъ ва Ватандин ЧIехи дяведа Гъалибвал къачурдалай инихъ 80 йис тамам хьунихъ галаз алакъалу яз, «Лезги писателрин эсерра ватанпересвал» лишандик кваз тешкилна.
Иштиракчияр тебрикуналди, конференциядин макьсадрикай ихтилатуналди, мярекат СтIал Сулейманан райондин кьил Саид Темирханова ачухна.
Конференциядал хейлинбуру чпин фикирар лагьана. Алатай йисара хьиз, цIини хайи чIал вилик тухуник, аялриз ватанпересвилин тербия гуник лайихлу пай кутунвайбурув шабагьар агакьна. ИкI, Птидхуьруьн мектебдин муаллим Д. Жабраиловав райондин администрациядин патай гьуьрметдин грамота, Вини СтIалрин мектебдин муаллим М. Муталибовадив райондин кьили тIвар кхьенвай сят вахкана.
Мергьяматлувилин «Умуд» фондунин директор Савин Велиева хайи чIалаз талукь конкурсра агалкьунар хьайибуруз пулунин пишкешар гана. Пулунин пишкешар илимдинни тежрибадин конференциядин докладрин кIватIалар гьазурзавай ва чапдай акъудзавай А. Агьмедпашаевавни, ИМЦ-дин методист Н. Азимовадивни, муаллим Гъ. Ибрагьимовадивни вахкана.
Савин Велиева агалкьунар хьанвай вирибурув фондунин тешкилатчи, РД-дин Халкьдин Собранидин депутат Имам Яралиеван патай тебрикдин гафар агакьарна.
Чи мухбир
