18 йис хьайила, кIвалахиз «Дагдизель» заводдиз фейи Эседуллагь Садуллаевич Алиева, къени, яшар 80 йисарив агакьзавайлани, гьа карханада зегьмет чIугвазма. Фрезеровщикдин чирвилер къачуна, зегьмет чIугвазвайла, ада Дагъустандин механический техникумдани кIелна. Гуьгъуьнлай Дагъустандин политехнический институт акьалтIарна, вичин чирвилерни тежриба генани артухарна.
Кьилин образование гвай, кIвалахални хъсан карчийрин сиягьда авай пешекар гьасятда старший инженердин къуллугъдал тайинарна. Ахпа гьа заводда гуьгъуьна амукьзавай участокар вилик жергейриз акъудунин везифаяр Эседуллагь Садуллаевичан хиве туна. Абурни ада виринра тамамвилелди кьилиз акъудна.
Эхиримжи 27 йисуз ам агъзурдалай виниз зегьметчийри кIвалахзавай цехдин начальникдин заместитель я. Вишелай виниз грамотайринни са кьадар медалрин сагьибдин шикил заводдин Гьуьрметдин доскада ава. 2023-йисан 17-декабрдиз гайи «За доблестный труд» медалди адан хурудал алай амай медалрин арада иллаки нур гузва. 2006-йисалай ам «Зегьметдин ветеран» я.
Мукьвара 80 йис жезвай Эседуллагь Садуллаевича къени зегьмет чIугвазва. Ам алай вахтунда заводда акъудзавай затIарин ери ахтармишзавай комиссиядин, зегьметчийрин кIвалахдиз, жегьил инженеррин зегьметдин еридиз къимет гузвай ва мадни са шумуд комиссийрин член я. КIвалахал кьабулзавай жегьил карчийриз хатасузвилин инструктаж тухузвай везифани адан хиве ава. «Дагдизель» заводдин коллективда Эседуллагь Садуллаевичаз еке гьуьрмет ва кесер ава.
Заводдин коллективди, хизанди, мукьва-кьилийри, ярар-дустари Эседуллагь Садуллаевичаз 30-октябрдиз тамам жезвай 80 йисан юбилей рикIин сидкьидай мубаракзава. Къуй вичихъ 100 йис жедалди зегьмет чIугвадай къуватар, мумкинвилерни чандин сагъвал хьурай!
Чи мухбир
