Асалдхуьр СтIал Сулейманан райондин кьиблепата, Кьасумхуьрелай 5,5 километрдин мензилдин агъадихъ экIя хьанва. Къунши хуьрерик Цийи Испик, Бутахуьр, Салиян, Пиперхуьр, Зугьрабахуьр, Уллу-Гъетягъ акатзава.
Асалдхуьруьн тIвар адан бине кутур Асалидихъ галаз алакъалу я. Ам къурбанддин гьайванар тукIвадай кьасабчи тир лугьуда. Асалидин сур хуьруьн сурарин виле акьадай чкадал ала.
1886-йисан переписдин делилрал асаслу яз, Асалдхуьре 318 касдикай ибарат (147 итим ва 171 дишегьли) 57 майишат авай.
Чи йикъара и хуьре 70-далай гзаф майишатар ава ва 300-дав агакьна агьалияр яшамиш жезва. Алай вахтунда Асалдхуьр Испикрин администрациядик акатзава. Хуьре тамам тушир юкьван мектеб, медениятдин кIвал, медицинадин пункт ва яшайишдин маса идараяр кардик ква.
Мурад Мегьамедкеримован «СтIал Сулейманан район: тарихдин гелерай» ктабдай.
