Са тIимил йисар идалай вилик “ЛГ”-диз агъсакъал, алим Исламудин Гьуьсейнован макъала акъатнай. Ана жегьилриз ахлакьдин, марифатдин, ватанпересвилин тербия гуникай ихтилат физвай. Ада гъуьлуьз физвай чи рушариз лезги шаир С.Шагьпазован цIарар чешне гъанвай:
Машмаш таран хел акьур,
Авахьдайла гъел акьур,
Женжел калин пел акьур,
Справкаяр тахьурай куь сандухра,
Куь михьивал хьурай лацу яйлухра!
И цIарар рушари гьатта гимн хьиз кьабулна кIанзавайдакайни лагьанвай.
Зазни и цIарар пара хуш хьанай ва абуру зи рикIел жуваз ван хьайи гуржийрин ажайиб са адет хкана. Лугьуда хьи, гуржийри гъуьлуьз фидай рушав амай жигьизрихъ галаз дуьньядин эдебиятдин кукIушрикай сад тир Шота Руставелидин “Пеленгдин хам алай пагьливан” поэмани вугузва. Адай халкьдин уьмуьрдин сегьнеяр, хесетар аквазва. Эсердин сюжетдин бинеда Ватан патал гьамиша чанни гуз гьазур тир пуд дуст — пуд игит ава. Абур пудни муьгьуьббат патал, чпин хци турар хкажна, мичIивилиз, лукIвилиз, истисмарчивилиз акси экъечIзава. Бедбахтвилерал, бахтсузвилерал гьалтайла, зегьметчи вири халкьар сад тирди къалурзава. Баркаллу кьиникь беябурчи уьмуьрдилай хъсан тирди, кьисметдин чарх маса патахъ элкъуьриз жедайди, виридалайни хаталуди вич винелай дуст яз къалурзавай душман тирди, писвал са легьзединди, хъсанвал, къени крар мидаим тирди лугьузва. ГьакI тирвиляй адакай гуржийрин рушахъ галаз ракъурдай кьилин шей хьана.
Заз зи уьмуьрдайни са вакъиа рикIел хкиз кIанзава. Гъуьлуьз рекье твадайла, бадеди зав гвай сандухдин кIане ва шейэрин винелни “Лезги газет” экIянавай. Закай сандухда “Лезги газет” аваз фейи свас хьана.
Гуржийрин адет рикIеваз, за къе и кардал дамахни ийизва. Са затIни тежедалди ва я маса “документар” жедалди, милли газет сандухда хьун тарифлу лишан тушни?!
Зун аял чIавалай чи газет кIелзавай кас я. Бубади ам гьар йисуз кхьизвай ва чаз кIанарни авуна. Къе зи хизандани “Лезги газет” рикI алай багьа мугьман я.
Лезги хизан гьина яшамиш жезватIани, кIвале лезги чIалалди рахун чарасуз я. Чи милли пресса, сифтени-сифте “Лезги газет” чи чIал, чи культура, чи милливал хуьзвай тадарак яз амукьна кIанда. Чна ам инлай кьулухъни хуьн, адахъ далу акалун лазим я. Гьавиляй, гьуьр-метлубур, чна чи чIал хуьн, багъри газет кхьин чарасуз я. Ингье алимдин макъаладин цIарари гьихьтин фикиррал гъанатIа зун.
Тамила Салманова
