Вири эхна кIанзава

Вири эхна кIанзава,

КIвалинбурни патанбур.

Дуьз акьулдал къвен тийиз,

Бейни квахьай пиянбур.

 

Вири эхна кIанзава,

Гьуьжетдайбур аксина.

Ченеда гъуд атIумна,

ЭкъечIдайбур бягьсина.

 

Вири эхна кIанзава,

Вафасузбур гьуьрметдиз.

Ви бахтуни гъидайла,

КьецI гудайбур кьисметдиз.

 

Вири эхна кIанзава,

Кьилиз тефей макьсадни.

Уьмуьрлух рикI динж тийиз,

Ферсуз жедай веледни.

 

Вири эхна кIанзава,

Чан лугьудай ви чандиз,

Кьулухъай ваз сас регъвез,

КIас гудайбур дабандиз.

 

Гумир рикIиз секинвал,

Фикир це гьар инсандиз.

Анжах эхмир хаинвал,

Ватандизни хизандиз.

 

Къарини свас

 Ислягь кIвале са хизанда къал хьана,

Къарини свас туьнт гьуьжетра гьатзава.

Фитнечийриз фикир желбдай кIвал хьана,

Туькьуьл мецер хабарар гуз катзава­.

Къари:

Вун аш къанваз, фу хъухъванваз гъайид туш,

Вун и кIвализ къуллугъ ийиз гъайид я.

Свас:

Заз къайи аш хъухъвай фу ван хьайид туш,

Зун дидеди ханд ханум хьиз хвейид туш.

Къари:

И кIвале ваз ахьтин кефер жагъидач,

Част жедалди къарагъ тийиз месикай

Свас:

А хесет за гзаф яргъал вегьедач,

Амма икрагь жезва зун ви мецикай.

Къари:

Заз садрани свас ван хьанач вун хьтин,

Къарид чина къаратикен цаз жедай.

Свас:

Юкъуз чирагъ гваз къекъвейтIан, зун хьтин

Свас жагъич квез кIвале къайда тваз жедай.

Къари:

Сад — кьве арза ийин за ви итимдиз,

Вакай хъсан фикир чандай катнава­.

Свас:

Архайин хьухь, атай къалай лигимдиз,

Ам балугъ хьиз, зи кIирина гьатнава.­

Къари:

Рахамир вун, чанда икьван зур аваз,

Килигда чун, акатда вун гъилик зи.

Свас:

Чина экуь разивилин нур аваз,

Къари, вуна гардан кIирда вилик зи.

Къари:

Акьван харчи ийимир на мез жуван,

Ахьтин гафар кьабул тийир кас я зун.

Свас:

Чир хьухь, къари, гьалалдин фу нез жуван,

Уьзуьагъдиз гъуьлуьз атай свас я зун.

Къари:

Бес я, бес я, ахьтин фурсар низ  я ви,

Фидай кIвализ акьулни гваз къведайд я.

Свас:

Я чан къари, акьван ажугъ куьз я ви,

Чаз, жегьилриз, ахвар ширин жедайд я…

 

Къариблухда

 Къариблухда яшайиш физ,

Руьгьда хайи ватан я, дуст.

Къене адахъ ялвардай рикI,

Михьи намус виждан я, дуст.

 

Лагь са мани ватандикай,

Зи дарих рикI алахьдайвал.

Вилин накъвар хъуьхъверлай къвез,

Ченедкай гъуз авахьдайвал.

 

Накъвар чилин булахрай яд

Хъвадайла заз хьайибур я.

Зун ватандихъ цIигел хьайла,

Дерт алудиз гайибур я.

 

Къизгъин рикIиз эмир гана,

МефтI кутуна къекъведа зун.

Гьар са мезре хиялра тваз,

Чубарук хьиз элкъведа зун.

 

ЧIал зи мефт я, ватан зи рикI,

Беден — чилин няметдикай…

Гъурбатда кас тахьуй гъарикI,

Магьрум хьана миллетдикай.

 

Лагь са мани ватандикай,

Везин рикIиз таъсир хьурай.

Гъурбатда жув хан жедалди,

Зун ватанда есир хьурай.

* * *

Бязи инсан уьтквемвили хкажна,

Пачагьвилин дережадиз акъудда.

Хъвадай залум ичкиди ам агажна,

Миллиарддар кепекдал кьван авудда.

Исмихан Къадимов

 

Чан зи лезги чIал!

Зи багьа чIал, чаз Эминан аманат,

Лайлай хьайи кьепIин кьилихъ дидейрин,

Зи хуруда рикIи тунва къиямат,

Хирде извай чIал акурла вядейри.

 

Курай зи чан, цIивин хьана курай ам,

Лезгистандиз ишигъ гурай ялавди.

ЧизвачтIа чIал, акъудда за хурай ам,

МефтIер кьванни хци урай къилавди.

 

Акъвазда зун ви сергьятрин сенгер хуьз,

Ви сирерин назиквилин гьиссер хуьз,

ТIебиатдиз гатфар йикъан сегьер хьиз,

Багьа я вун заз, чан зи лезги чIал!

* * *

Къекъведайла чам хьайитIан гарданда,

Ваз минет я, чам тваз тахьуй вижданда.

Вун рикIеваз муьгьуьббатдин гьижранда,

Чан гуда за, муг хьурай ваз зи чанда.

 

Гъуьрчехъандин лишандикай катзавай,

Хам жейран хьиз вун рагара гьатзава.

Вуна закай Керем, Межнун, Фаргьадзава,

Инсафлу хьухь, гьикьван за ваз дадзава.

* * *

Заз рехъ къалуз, туькIуьриз тIуб,

Рекьевай инсан аквазмач.

Цихъ къарихдав агъудиз хупI

Ийиз тазва, лейсан аквазмач.

* * *

Дуст вуж ятIа заз чир хьанач,

Хьайидазни зи къадир хьанач.

ТIурунал нез, вил акъудна тумунал,

И кар гьиссна анжах за геж хамунал.

* * *

Зи чандава гумни ялав,

Ватандинни миллетдин.

Вижесузрин гъиле жилав

Гьатнава чи кьисметдин.

* * *

Акъатда тIал зи рикIевай,

Акурла кас дуьз рекьевай.

Ватан патал мерд крара,

Зегьмет чIугваз, кIвенкIве авай.

Лга Энвер

 

Бубади хциз

Къуншидихъ галаз

Хьухь мегьрибан яз,

Сивел хъвер алаз,

Акьуллу хьухь, хва.

 

Тапарар мийир,

Чир жеда эхир.

Хиве кьаз тахсир,

Акьуллу хьухь, хва.

 

Чарадан девлет

КIан жемир рябет.

Нефсиниз — тербет…

Акьуллу хьухь, хва.

 

Чарадаз зиян

Гумир на садран.

Гьуьрмет хуьз жуван,

Акьуллу хьухь, хва.

 

Кьуьзуьдаз, гьелбет,

Ийиз хьухь гьуьрмет.

Жеда берекат, —

Акьуллу хьухь, хва.

 

Къачуз на буржар,

Къугъвамир къумар,

Мийир жув бизар,

Акьуллу хьухь, хва.

 

ПIапIрусар чIугваз,

Эрекь, чехир хъваз,

Жемир кьил къутаз,

Акьуллу хьухь, хва.

 

Кьуьзуьвал

Дегиш жеда тамам инсан,

Кьуьзуьвилин я ам лишан.

Са хесетни туш ви хъсан,

ТакIан я заз вун, кьуьзуьвал.

 

Гагь-гагь жеда кефияр чIур,

Гъилер зурзаз, кьаз тежез тIур.

Юкьни хьана тамам какур,

ТакIан я заз вун, кьуьзуьвал.

 

Вилерин экв хьана зайиф,

КьатIуз тежез къаргъани лиф.

Рагъ авай югъ-авай хьиз циф.

ТакIан я заз вун, кьуьзуьвал.

 

Япара жез зив-зивдин ван,

Ахвар текъвез, жеда шуван,

Ихьтин гьалар эхда гьикьван,

ТакIан я заз вун, кьуьзуьвал.

 

Ачух тежез масадаз сир,

Мажбур жеда ийиз фикир.

ГьикI жедатIа лугьуз эхир,

ТакIан я заз вун, кьуьзуьвал.

 

Вуч затI ятIа чин тийиз тIал,

Бедендани жедачир къал,

Гьайиф тушни, чан жегьилвал!

ТакIан я заз вун, кьуьзуьвал.

Гьаживерди Уьзденов