Девирар къвез алатзава, гьерекатар тарихда гьатзава. Алай вахтунда дуьньяда саки 8 миллиард инсан яшамиш жезва. Абур сад-садан гъавурда акьун патал чIалари куьмекзава. Агъзурралди алимри чIалариз талукь месэлаяр веревирдзава, абурун винел кIвалахзава, сирерай кьил акъудзава. ЧIалан къуват екеди я. Макъалада заз жуван хайи чIалакай — лезги чIалакай рахаз кIанзава. За фикирзавайвал, хайи чIал рикIелай алудун ахмакьвал авун, инсанди ахъайзавай виридалайни чIехи гъалатIрикай сад я. За жуван дидед чIалал акъатзавай газет (виликдай “Коммунист”) кхьиз 55 йис тамам хьанва. Зун патарал гзаф хьайи кас я. Гьикьван маса халкьарин векилрин арада яшамиш хьанатIани, за жуван чIал садрани рикIелай ракъурнач, ам за гьамиша сифте чкадал эцигзава.
Заз мадни лугьуз кIанзава: чаз Аллагь-Таалади дидедин чIал вини дережада аваз хвейи Гьажи Давуд Муьшкуьрви, Ярагъви Мегьамед, Алкьвадар Гьасан эфенди, Етим Эмин, СтIал Сулейман, Кьуьчхуьр Саид, Куьре Мелик… гана. Шад я, абурун рехъ давамарзавайбурни ава: алимарни, шаирарни, писателарни… Амма зи рикIик къалабулух кутазвай са месэла ава. Амни “Лезги газет” кхьиниз талукьди я. Редакцияда яргъал йисара кIвалахзавай бажарагълу журналистри чав гьар юкъуз чи хуьрера, районра, республикада, дуьньяда кьиле физвай вакъиайрикай, шадвал ва къалабулух кутазвай месэлайрикай, хайи ерийра ва яргъара яшамиш жезвай чи ватандашрикай хабарар агакьарзава. Амма чна гьихьтин къуьн кутазва абурун кIвалахдик? Жуван дидедин чIалалди акъатзавай са газетни 2-3 журнал кхьин тавун чаз кутугнавани?! Дугъри я, алай вахт четинди я. Фикир гайитIа, вахтар регьятбур садрани хьайиди туш, гьар са вахтунихъ вичин регьятвилер хьиз, четинвилерни хьайиди я. Гьавиляй жуван милли газет ва журналар кхьин за гьар садан пак буржи яз гьисабзава. И кар тийизвайбур заз жуван хайи чIал бегенмиш туширбур ва саймиш тийизвайбур яз аквазва.
Лезги чIалал акъатзавай газет ва журналар кхьинин карда чи эдебиятдин, медениятдин, педагогикадин хилера зегьмет чIугвазвай ксар кIвенкIве хьун герек я.
Кьилди къачуртIа, йис патал “Лезги газет” кхьинин къимет 977 манат тирди чаз аквазва. Бязибуру багьа я лугьузва… Гьуьрметлубур, ужуз вуч ама? Мехъеррик атана, фонограммадин куьмекдалди 4-5 мани лагьана, гьикьван пул къачузватIа, квез аквазва хьи (амайбурукай зун рахазвач)… Бес абуру тамамарзавай манияр лезгидалди тушни?! Абур чи бажарагълу шаирар тир Етим Эминан, СтIал Сулейманан, Алирза Саидован, Хуьруьг Тагьиран, Шагь-Эмир Мурадован, Фейзудин Нагъиеван, Сажидинан ва масабурун чIалар тушни?!
Жуван хайи чIалалди акъатзавай газет кхьин гужунин кIвалах туш, ам гьар са лезгиди вичин хушуналди кьилиз акъудзавай пак буржи, жуван намусдин вилик михьивал я лугьуз кIанзава заз.
«Лезги газет»
