ТАСС-ди хабар гузвайвал, тахминан 2026-йисуз Дагъустан тамамдиз газдалди таъминарна акьалтIарун мумкин я. И макьсадриз «Газпром» ПАО-ди 13,1 млрд манат пул чара ийида. РикIел хкин, мукьвара 2021-2025-йисара газдалди таъминарунин кIвалах вилик тухунин жигьетдай кардик кутунвай программадал РД-дин Кьилин везифаяр вахтуналди тамамарзавай Сергей Меликова ва “Газпром” ПАО-дин правленидин председатель Алексей Миллера къулар чIугуна.
И программа кьилиз акъудунин нетижада Дагъларин уьлкве тамамдиз газдалди таъминарунин кIвалахар акьалтIда. И документдал асаслу яз, регионда 874 километрдин мензилдиз газдин турбаяр тухуда. Республикадин 23 райондин 194 хуьр газдалди таъминардай шартIар арадал гъида. Сифте нубатда кIвалахар Агъул, Ахвах, Гуниб, Рутул ва Унцукул районра кьиле тухуда.
Гьа са вахтунда 10 районда ва Дербент, Избербаш, Къизляр, Махачкъала, Хасавюрт шегьерра газораспределительный станцияр цIийикIа туьхкIуьр хъийида. 2020-йисан 1-январдин делилралди, Дагъустандин 89,5 процент (хуьруьн чкаяр — 76,7, шегьерар 93,7 процент) газдалди таъминарнава.
«Лезги газет»
