И мукьвара Кьурагьа, Хизандин йисан ва СтIал Сулейманан 155 йисан юбилейдин сергьятра аваз, 10-сеферда яз, халкьдин макьамрин ва манийрин «Кьурагь дагъларин авазар» фестиваль кьиле фена. Ам райондин кьилин заместитель Рамазан Катибова ачухна. Ада фестиваль кьиле тухунихъ милли меденият машгьурунин карда хъсан метлеб авайдакай, и мярекатди жуван халкьдин адетрал, медениятдал ашукьбур кIватIзавайдакай лагьана.
Райондин администрациядин пресс-къуллугъди хабар гайивал, РД-дин культурадин министерстводи, Республикадин халкьдин яратмишунрин кIвали, райондин администрацияди ва медениятдини туризмдин центради тешкилай мярекатда «Кьурагь дагълар» халкьдин хорди, райондин медениятдин хилен къуллугъчийри иштиракна. Абуру устадвилелди тамамарай манийри, макьамри яб акалзавайбурун гуьгьуьлар шадарна.
Эхирдай фестивалдин вири иштиракчийриз халкьдин авазар хуьник, машгьур авуник пай кутунай Кьурагь райондин администрациядин кьилин ва медениятдинни туризмдин центрадин патай дипломар ва пишкешар гана.
Чи мухбир
