Эминхуьруьн ктабханада «Лезги чIалан аламатар чIехи я» лишандик кваз лезги чIал хуьниз ва вилик тухуниз талукьарнавай мярекат кьиле фена. Ана хуьруьн администрациядин кьил Сабир Юзбегова, райондин ва хуьруьн яратмишдай интеллигенциядин векилри, ктабханадин кIелзавайбуру, хуьруьн школадин муаллимри иштиракна.
Мярекатдин сергьятра аваз цIийи дараматдиз экъечIнавай ктабханада лезгийрин машгьур писателрин ва шаиррин ктабрин «Лезги чIалан аламатар чIехи я» выставка ва «Лезги чIал хуьх, лезгияр!» стенд акъуднавай.
Хайи чIал хуьнин ва вилик тухунин важиблувиликай куьрелди ихтилат авуналди, мярекат ктабханадин заведующий Алла Буржалиевади ачухна.
ЦIийи дараматда тухузвай сад лагьай мярекат адан иштиракчийриз Эминхуьруьн АСП-дин кьил Сабир Юзбегова тебрикна.
Эминхуьруьн юкьван школадин сифтегьан классрин муаллим Гуьлханум Наврузовади лезги чIалан тарихдикай, лезги чIаланни литературадин муаллим Жамиля Жигеровади чIал хуьн ва вилик тухун патал школада кьиле тухузвай мярекатрикай, школьникри дидед чIалан олимпиадайра ва конкурсра къазанмишзавай агалкьунрикай гегьенш рахунар авуна. Вичин рахунар ада журналист ва шаир Хазран Кьасумова лезги чIал хуьниз эвер гун яз кхьенвай шиир кIелуналди акьалтIарна.
Хазран Кьасумова вичин рахунра филологиядин илимрин кандидат Нариман Абдулмуталибова кьил кутуналди районда гьар йисуз чIал чируниз, хуьниз ва вилик тухуниз талукьарна тухузвай илимдинни практикадин конференциядикай, адан менфятлувиликай, 1973-йисалай вичи сих алакъа хуьзвай «Лезги газет» ва 1990-йисалай кIвалахзавай «Куьредин хабарар» газетри лезги чIал хуьн ва вилик тухун патал тухузвай кIвалахдикай метлеблу рахунар авуна, лезги гафарганрикай вичин фикирар лагьана.
Эминхуьруьн агъсакъалрин Советдин член, «Хутаргъар» ва «Хутаргъвияр» ктабрин автор Исмаил Агьмедова лагьайвал, чIал квахьай халкьни квахьзавайди я. Чна аялриз дидед чIал, абур лап гъвечIи яшара амаз, хизанда чирна кIанда.
Ктабханадин кIелчияр-школьникар тир Юсуф Кьасумова, Селминат Кьасумовади, Айшат Рамазановади, Шамсудин Къадирова, Милена Нурметовади ва масабуру чIалакай лезгийрин машгьур шаирри кхьенвай шиирар кIелна.
Х. Гьажибалаев
