Дяве. Мус хьайитIани, гьина­ хьайи­­тIани, мусибат я ам. Ада инсан­ривай — уьмуьр, дидейривайни бубай­ривай — рухваяр, вахаривай стхаяр, ве­лед­ривай бубаяр… къакъудзава. Ри­кIе­ра сагъ техжедай хер твазва.

1999-йисан август. Чечнядин Чеберлоев ва Шатой районар галай патахъай Дагъустандин БотIлих ва ЦIумада районриз хъсандиз яракьламиш хьанвай, кьиле международный террористар тир Басаев ва Хаттаб авай боевикар гьахьна. Абуру са шумуд хуьр кьуна.

Дагъвийрин рикIер къарсурай и йикъара Буйнакскдин райондин Къарамахи, Чабанмахи хуьрерин вагьабит­рини кьил хкажна, гъиле яракь кьуна.

Гьа икI, Дагъустандин чилел боевикри  дяведик кьил кутуна. Дагъвияр мугьманперес халкь я. Амма, гъиле яракь кьуна, рикIе чIуру ниятар аваз, сухулмиш хьун — им дагъвийрин намусдивай кьабулиз тежедай кар тирди боевикри кьатIанач. Такабурлу лекьер хьиз, дагъвияр душмандин хура акъвазна. Гьа ихьтин кьегьал рухвайрикай сад СтIал Сулейманан райондин Герейханован хуьруьн 2-отделенидай тир Дибиров Милгьажидин Алаудинович тир. Лугьуда хьи, игитар жезвайди туш, игитар яз хазвайди я дидейри Милгьажидин хьиз…

М. Дибиров 1974-йисан 3-мартдиз­ Алаудинан ва Назифатан зегьметчи­ хи­занда дидедиз хьана. Герей­ха­но­ван­ 2-нумрадин юкьван школа акьал­тIа­райдалай гуьгъуьниз кьве йисуз­ ­армиядин жергейра къуллугъна. Низам, къайда, дуьзвал, гьахъвал­ кIан­дай Мил­гьажидин, са артух фикир-хиял ­тавуна, къайда­яр хуьдай органра ­кIва­ла­хал акъвазна. Са куьруь­ девирда  М. Ди­бирова­ вич кар алакьдай милиционер яз къалурна. Ада Буйнакскдин райондин ОВД-да дорожно-постовой къуллугъдин госин­спекциядин (ДПСГИ-дин) инспекторвиле кIвалахзавай. Вичиз кIани рушал­ эвленмиш хьанвай Милгьажидинан ри­кIе къени, гуьзел, экуь мурадар, къас­тар гзаф авай. Абурукай сад вуз акьалтIарун ва къуллугъдин рекьяй виликди фин тир. Амма хабарсуз башламиш хьайи дяведин гьерекатри М. Дибирован уьмуьрдин планар дегишарна.

Ватан хаталувик ква, душмандив­ чIуру ниятар кьилиз акъудиз туна­ кIан­дач лагьана,  Буйнакскдин РОВД-дин маса са шумуд работникдихъ галаз    М. Дибировни Кадардин зонадиз­ фена, бандитрихъ галаз женгиник экечIна. Нубатдин са женгина, 1999-йисан 18-­сентябрдиз, милициядин старшина М. Дибиров игитвилелди телеф хьана.

Лекьре цава чан гуда лугьуда. Игит касни яргъалди яшамиш жедач. Да­гъус­тандин литературадин классик Омарла Батыраяхъ игитдикай кхьенвай ихьтин цIарар ава: “Игитдин рехъ куьруь я, Гудач пара Аллагьди…” Саки 155 йисан вилик лагьанвай и келимайрин мана къенин йикъарани квахьнавач. Телеф хьайила Милгьажидин Дибирован анжах 25 йис тир.

Россиядин Президентдин 1999-йисан 27-декабрдин 1728-нумрадин Указдин бинедаллаз милициядин старши­на Милгьажидин Дибироваз (кьейи­далай кьулухъ) «Жуьрэтлувиляй»­ орден гана.

Дагъустан Республикадин Госсоветди 2001-йисан 13-июлдиз 177-нумрадик кваз акъудай Указдин бинедаллаз Милгьажидин Алаудинович Дибирован тIвар ада кIелай Герейханован 2-нумрадин юкьван школадиз гана. И кардиз талукь яз мектебда кьиле фейи мярекатдал Россиядин Президентдин тIварунихъай Буйнакскдин РОВД-дин начальникдин заместитель А. М. Расулова орден кьегьал хцин буба Алаудин Рагьмановичав вахканай.

Игит хва М. Дибирован лайихлу­ви­лерикай, кьегьалвилерикай В. Бударо­­ван «Во имя жизни», Р. Гьажие­ван­ «Час испытания», А. Алиеван «Память­ о погибших вечна» ктабра кхьенва. Адан тIвар Буйнакскдин райондин ОВД-дин работникрин сиягьда гьамишалугъ яз кхьенва.

Алай йисан 2-сентябрдиз Герейханован хуьре М. Дибирован тIварунихъ галай школадин кьве мертебадин дарамат ачухна. Адан кьвед лагьай мертебада дегьлиздин цлал мармардин плитадал атIанвай Милгьажидин Дибирован чIехи шикил ала. Шикилдин кIаникай адан уьмуьрдиз, къуллугъдиз ва игитвилиз талукь къейдер кхьенва.

— Гьар пакамахъ школадиз атай­ла, гьам муаллимри, гьамни кIелза­вайбуру, Милгьажидин Дибирован шикилдин вилик акъвазна, адаз салам гузва, — лагьана чаз мектебдин директор Малавудин Сафаралиева­. — Ида къалурзава хьи, Ватандин азадвал, абадвал, садвал, дагъвийрин намус хвейи, и кар патал чпин чанар къурбанд авур Милгьажидин Алаудинович Дибиров хьтин кьегьалрин тIварар, экуь къаматар халкьди сад­рани рикIелай ракъурдач. Игитар рекьидач, абурун тIварар эбеди я!

Хазран  Кьасумов